Vielha, 26 de gèr de 2018.- Eth Conselh Generau d’Aran a renauit eth contracte damb es responsables deth servici meteorologic dera Val d’Aran “Meteoaran” entad an 2018.

Meteoaran entrèc en foncionament en noveme de 2016 e damb pòc mès d’un an s’a convertit en referent entà fòrça persones e entitats que s’interèssen pera prevision deth temps ena Val d’Aran. Meteoaran neishec damb er objectiu de sajar de garantir un major grad de capitada e de qualitat ena prediccion climatologica qu’ena Val d’Aran pren totau importància en iuèrn mès tanben eth rèste des mesi der an. Aguest servici de prediccion meteorologica complète eth ja existent de prevision de risqui naturaus e de lauegi deth Centre de Lauegi deth Conselh Generau d’Aran.

Eth servici de meteorologia d’Aran, que n’ei responsable Àlex Sirat, aufrís previsions de 3 dies e enes sasons des hèstes de Nadau e pònts festius ampliadi a 5 dies. Tota era informacion se pòt consultar a trauès dera pagina web deth Conselh Generau d’Aran, Torisme Val d’Aran e dera pròpria de Meteoaran. Toti es qu’ac desiren pòden ath delà imprimir eth grafic entà facilità’c coma informacion enes pannèus des otèls, comèrci, restaurants e d’auti establiments dera Val d’Aran.

Entara conselhèra de Torisme e Desvolopament Economic d’Aran, Anna Díaz, ei important poder aufrir un servici d’aguestes caracteristiques en relacion damb eth sector toristic qu’arregraís ues previsions meteorologiques que siguen çò mès fiable possibla, en tot ahíger, qu’era credibilitat e eth prestigi de Meteoaran hè que s’age assolidat coma referent entà consultar es previsions climatologiques deth nòste país.