• Eth manteniment d’aguesta oficina aufrís ath nòste territòri ua grana oportunitat entà promocionar eth torisme d’iuèrn entara pròplèu tempsada e tanben compòrte un foment important entà publicitar es atractius dera Val d’Aran pendent tot er an

Un an mès, eth govèrn d’Aran e Baqueira Beret an renauit eth sòn convèni de collaboracion entath manteniment dera sua oficina de torisme conjunta plaçada en numerò 39 dera Rue du Pharaon de Tolosa.

Eth manteniment d’aguesta oficina de torisme, afirmaue era sindica d’Aran, Maria Vergés, “mos permet apropar encara mès eth nòste territòri, cultura e activitats as vesins dera region sud de França, un endret qu’a un pes fòrça important ena economia d’Aran”.

Pera sua part, eth vicesindic e conselhèr d’Economia, Torisme e Promocion Economica, Juan Antonio Serrano, asseguraue qu’aguest conveni “mos aufrís ua grana oportunitat entà promocionar eth torisme d’iuèrn ena Val d’Aran e Baqueira Beret de cara ara pròplèu tempsada d’esquí, mès tanben compòrte un foment important entà publicitar es atractius deth territòri pendent tot er an”.