• Ena prumèra amassada mantenguda damb es alcaldes e alcaldesses d’Aran, s’a parlat d’ahèrs coma era assisténcia deth govèrn aranés as ajuntaments mès petits en ahèrs tecnics, eth projècte de gestion forestau e profitament dera biomassa o er estat deth servici de remassada de lordères

Eth Conselh Generau d’Aran a acuelhut eth prumèr Conselh de Bailes dera legislatura, a on era equipa de govèrn a profitat entà meter-se a disposicion des besonhs que poguen auer es alcaldes e alcaldesses d’Aran en sòn prètzhèt pendent es pròplèus quate ans.

Entre es ahèrs tractadi, s’a parlat dera possibilitat qu’eth Conselh aufrisque servicis d’assisténcia tecnica as municipis aranesi en matèria urbanistica, informatica e d’expedicion des documents dera ponéncia ambientau. Ua assisténcia que se darie, especiauments, as ajuntaments mès petits que non an personau especializat en aguesti airaus ena sua institucion.

Un aute des punts tractadi a estat eth projècte de gestion forestau e profitament dera biomassa. Eth sindic d’Aran, Francés Boya, a explicat que “er objectiu d’aguest projècte ei qu’era Val d’Aran sigue capaç d’hèr ua gestion des pròpris bòsqui entà qu’aquera husta  servisque entà alimentar es caudères de biomassa qu’ei previst installar enes edificis publics e que, de bèra manèra podesquem repréner era activitat ena politica forestau”.

Eth sindic soslinhe: “auem ath torn d’ues 15.000 tones de husta disponibles cada an e que, per tant, ei ua husta que s’a de profitar e que pòt milhorar, per ua part, era nòsta qualitat ambientau e, per ua auta, era economia des nòsti ajuntaments, pr’amor qu’ei un recors pròpri que sonque mos cau saber emplegar”. Ath delà, “damb aguest projècte sajaríem de contribuir a mitigar es efèctes deth cambi climatic en tot hèr a servir ua energia renovable e de proximitat”.

En darrèr lòc, s’a tractat  tanben er estat actuau dera prestacion dera remassada de lordères. Eth Conselh a informat as representats municipaus e des EMDs araneses des contactes mantenguts damb era enterpresa que gestione aguest servici, atau coma des accions que se van a préner entà milhorar era remassada.

En aguest airau, eth Conselh Generau d’Aran a decidit ampliar eth servici de remassada des fraccions de selectiua, se realizarà tanben un mapa de punts critics e eth conselhèr de Territòri, Paisatge e Gestion ambientau, Oriol Sala, s’amassarà damb toti es alcaldes e alcaldesses d’Aran entà conéisher es deficits de cada municipi sensibles de milhorar, se crearà era figura des agents civics e s’iniciarà ua campanha de conscienciacion ciutadana entà milhorar es mecanismes e abituds der usatge deth servici de lordères.