• En tot sajar de melhorar es donades de remassada selectiva, eth Conselh Generau d’Aran, en collaboracion damb er Ajuntament de Vielha e Mijaran, implementarà coma pròva pilot en aguest municipi eth projècte Reciclos d’Ecoembes, que digitalize eth reciclatge d’ampolhes e lhaunes de plastic e compense as persones comprometudes damb incentius sostenibles e sociaus

Es vesins e vesies de Vielha e Mijaran comprometudi damb eth reciclatge obtieràn a compdar d’ara recompenses cada còp que reciclen es sues ampolhes e lhaunes de plastic de begudes. Açò ei possible gràcies ara apòsta deth govèrn deth Conselh Generau d’Aran, en collaboracion damb er Ajuntament de Vielha e Mijaran, per Reciclos, eth prumèr sistèma de Retorn e Recompensa de reciclatge en España, un sistèma desvolopat per Ecoembes, era organizacion ambientau sense anim de lucre que coordine eth reciclatge d’envasi en tot eth pais.

D’aguesta forma, Vielha e Mijaran se convertís en un des prumèrs municipis catalans en apostar per aguest sistèma de reciclatge qu’incorpòre era tecnologia movil en aguest abit e, ath còp, compense ara ciutadania comprometuda damb incentius qu’ajuden a melhorar eth sòn entorn mès propèr.

Eth projècte Reciclos siguec presentat ager peth sindic d’Aran, Francés Boya, e eth portavotz d’Ecoembes en Catalunya, Enric Ibáñez, en un acte celebrat de forma telematica en quau participèren tanben eth conselhèr de Territòri, Paisatge e Gestion Ambientau, Oriol Sala, eth tinent d’alcalde der Ajuntament de Vielha e Mijaran, Alberto López, e eth tecnic de gestion de residus deth Conselh Generau d’Aran, Guilhèm Piris, entre d’auti.

Pendent er acte, eth conselhèr Sala afirmèc que: “èm plan satisfèti de poder implementar en municipi de Vielha e Mijaran aguest projècte, pr’amor qu’ath delà de potenciar eth reciclatge d’ampolhes e lhaunes de begudes, aufrís uns incentius collectius qu’involucren as associacions locaus, que pòden presentar es sòns pròpris projèctes sostenibles” e higèc que: “era intencion deth govèrn deth Conselh Generau d’Aran ei trabalhar entà qu’aguest sistèma desvolopat per Ecoembes pogue extener-se en un futur a tota era Val d’Aran, en tot melhorar atau es nòstes donades de remassada selectiva”.

Es abitants deth municipi poiràn reciclar es sues ampolhes e lhaunes de plastic en un des 62 contenedors auriòs des sòns pòbles –enes quaus s’a incorporat aguesta tecnologia– e obtier recompenses en hè’c. Entre aguesti incentius, destaquen productes entà fomentar era mobilitat sostenible e accions sociaus coma contribucions ath Banc d’Aliments.

Entà hèr a servir Reciclos, era ciutadania de Vielha e Mijaran sonque a d’accedir ara webapp, escanejar eth còdi de barres der envàs que vòlen reciclar e dipositar-le en un des contenedors auriòs. D’aguesta forma obtieràn punts, nomentadi Reciclos, que poiràn escambiar per diferents incentius.

“Gràcies a Reciclos, era ciutadania comprometuda damb eth reciclatge, ath delà d’ajudar a estauviar energia o dar ua naua vida as envasi en tot reciclar-les en contenedor auriò, ara poiràn  tanben contribuir a melhorar Vielha e Mijaran a trauès des incentius que s’obtien en reciclar. Ei eth prumèr còp en España qu’un sistèma de reciclatge amasse era tecnologia e compensacions qu’an coma objectiu ajudar a reciclar mès e melhor” a afirmat eth portavoz d’Ecoembes en Catalunya.

Eth sistèma de Retorn e Recompensa de Reciclos neishèc en TheCircularLab, eth centre d’innovacion dubèrta d’Ecoembes. Dempús dera sua implementacion en quauqui municipis de Catalunya er an passat coma projècte pilòt, en collaboracion damb era Generalitat de Catalunya, s’a implementat enguan en endrets coma Calahorra (La Rioja) e Ciutadella (Menorca). Enguan Reciclos serà present en un totau de set Comunitats Autònomes e en 2021 ei previst qu’arribe a totes es regions d’España.