• Eth govèrn francés se compromet a crear era Oficina Publica dera Lengua Occitana, tau coma demanaue eth conselhèr d’Aquitània peth Partit Occitan, David Grosclaude.

                                 David Grosclaude (A. Torrent)

David Grosclaude, conselhèr regionau d’Aquitània hège 8 dies que se trobaue en grèva de hame peth mensprètz qu’arrecep era lengua occitana per part deth govèrn francés, en non voler dar continuïtat ara creacion dera Oficina Publica dera Lengua Occitana (OPLO), demanada pes Govèrns Regionaus d’Aquitània e de Meddia- Pirenèus.

Eth govèrn francés s’a compromés a crear era Oficina Publica dera Lengua Occitana, tau coma demanaue Grosclaude, e per aguest motiu, a abandonat era protèsta.

Era lengua occitana, nomentada aranés en Aran, ei oficiau en Catalonha e a d’èster objècte de proteccion en toti es encastres e sectors, cossent damb era nòrma aplicabla. Ei era prumèra lengua dera administracion aranesa, ei era lengua veïculara dera escòla aranesa, a ua preséncia importanta enes mejans de comunicacion, ei protegida pes institucions e pes leis e nòrmes catalanes e araneses.

Euròpa a ua riquesa lingüistica que cau protegir e era lengua occitana ei un des sòns referents.

Eth sindic d’Aran en foncions, Carlos Barrera, a manifestat “mos alegram que Grosclaude age finalizat era sua protèsta pr’amor qu’açò vò díder qu’era sua peticion a dat es sòns fruts”.

Eth Conselh Generau d’Aran se somèc e dèc supòrt ara peticion valenta de David Grosclaude ena defensa dera lengua occitana e des deth prumèr moment lamentèc auer d’arribar ad aguestes accions entà èster escotadi ena defensa dera pròpria identitat.