Vielha, 24 de març de 2016.- Eth conselhèr de Territòri deth Conselh Generau d’Aran José Antonio Boya, visitèc ager er ajuntament de Luchon a on mantenguec ua amassada damb era conselhèra municipau d’Espòrts e Vice-presidenta dera comission de politiques esportiues de Luchon, Brigitte Lapebie.

Pendent era amassada, es responsables d’ambdues institucions, trabalhèren sus era possibilitat de començar accions conjuntes de promocion en relacion ara organizacion per part deth Conselh Generau d’Aran dera gessuda dera 10au etapa deth Tour de França 2016 en Vielha e Mijaran deth pròplèu 10 de junhsèga.

Ath gésser dera amassada, Jose Antonio Boya avalorèc fòrça positivaments era experiéncia dera ciutat de Luchon, qu’istoricaments a acuelhut finaus d’etapes deth Tour de França. Ena edicion d’enguan, era nauau etapa dera carrèra ciclista gesserà dera ciutat francesa de Pau e acabarà en baigneres de Luchon. Londeman 10 de junhsèga, serà eth torn dera Val d’Aran des d’a on gesserà era 10au etapa deth Tour 2016, que se disputarà entre Vielha e Mijaran e Andòrra.

Eth conselhèr de Territòri José Antonio Boya declarèc qu’“entre quauques des prepauses que s’an comentat, dilhèu caberie era possibilitat d’organizar quauqua accion conjunta es dies 4 e 5 de junh d’enguan, damb motiu dera hèsta dera biciclèta en França, un eveniment que se celèbre des de hè 20 ans e que prenen en eth part mès de 20 milions de francesi de totes es edats aficionadi ath ciclisme. De totes manères ahigec, s’a tractat d’ua prumèra presa de contacte, qu’encara non s’a concretat arren”.