• Eth conselhèr, Francés Bruna, amassa damb un grop d’agents e tecnics de miei ambient, visiten Trentino entà contrastar experiéncies en ambit de gestion dera fauna sauvatja damb es especialistes italians

• “Conéisher coma gestionen en d’auti territòris era fauna sauvatja ei primordiau entà poder trobar solucions avientes ara problematica der os en Aran”, afirme eth conselhèr

Eth conselhèr de Territòri, Paisatge e Gestion ambientau, Francés Bruna, a viatjat, amassa damb un grop d’agents e tecnics de miei ambient, tà Trentino (Itàlia) entà contrastar experiéncies en encastre de gestion dera fauna sauvatja damb es especialistes italians. Un nau punt d’enguarda que servís entà sajar d’afrontar melhor es problematiques que genère era conviuença damb er ós.

En aguest viatge de trabalh eth grop aranés recep formacion entà poder dar respòsta deuant quinsevolh incidéncia o problèma relacionat damb aguest tipe de fauna. Eth conselhèr e es tecnics se formen en diferents tecniques e coneishen es esturments qu’emplegue era guàrdia forestau deth nòrd d’Itàlia entara gestion d’aguestes situacions.

Eth conselhèr Bruna afirme que “conéisher coma gestionen en d’auti territòris era fauna sauvatja ei primordiau entà poder trobar solucions avientes ara problematica der ós en Aran”, e hig que: “eth govèrn deth Conselh Generau d’Aran trabalhe entà qu’eth sector ramadèr dera Val d’Aran pogue auer es maximes garanties possibles entà amiar a tèrme eth sòn trabalh a despièch dera complèxa situacion que viuen”.