• Eth Conselh Generau d’Aran, era Generalitat de Catalunya e era Junta de Castilla y León participèren pendent era passada setmana en un escambi de coneishements e experiéncies sus era convivéncia dera ramaderia e era fauna sauvatja, en tot visitar diuèrses explotacions ramadères e apicòles deth territòri e méter en comun diferents linhes de trabalh en aguesta matèria

Eth conselhèr de Territòri, Paisatge e Gestion ambientau, Francés Bruna, amassa damb tecnics deth sòn departament e resposables deth departament d’Accion Climatica, Alimentacion e Agenda Rurau dera Generalitat de Catalunya, acompanhadi pes tecnics dera Direccion Generau d’Auviatge Naturau e Politica Forestau dera Conselheria de Foment e Miei Ambient dera Junta de Castilla y León, visitèren pendent dijaus 28 e dimenge 31 d’octobre era província de León, en tot compartir experiéncies sus era ramaderia e apicultura e era sua coexisténcia damb er os.

“Pendent aguesti dies, mos auem entrevistat damb ramadèrs de bestiar ovin, bovin e equin, atau coma damb explotacions apicòles dera província de León, entà conéisher de prumèra man eth trabalh e eth dia a dia d’aguestes explotacions e era sua convivéncia damb er os, e tanben auem profitat entà entrevistar-mos damb representants dera Asociación de Criadores de Laciana de Mastín Español”, explicaue eth conselhèr Bruna, en tot híger que: “deth Conselh Generau d’Aran ençà trabalham entà qu’eth sector ramadèr dera Val d’Aran pogue auer es maximes garanties possibles entà amiar a tèrme eth sòn trabalh a despièch dera complèxa situacion que viuen”.

Aguest escambi d’experiéncies a permetut méter en comun es diferents linhes de trabalh des tres institucions en matèria de gestion der os ròi e es problematiques qu’afronten es ramadèrs d’aguestes comarques.

Pendent aguesti quate dies, s’an visitat explotacions enes localitats de Caboalles de Arriba, Sosas de Laciana, Lumajo, Quintanilla de Babia, San Emiliano, Villager, San Miguel de Laciana e Orallo, s’an compartit es mesures preventives adoptades damb er objectiu d’afavorir er escambi d’experiéncies damb es ramadèrs de León e er estudi e aplicacion as explotacions deth Pirenèu, a on era poblacion d’ossi a crescut enquias 64 exemplars censadi en 2021.

Era Junta de Castilla y León metec èmfasi en bon prèzthèt des ramadèrs de León, e expausèc es mesures adoptades per aguesta comunautat entà comptabilizar era preséncia e melhora der estat de conservacion der os damb es activitats economiques deth medi rurau, coma es subvencions entar aquesiment de pastors electrics e d’auti dispositius de proteccion e pagaments compensatòris pes danhs ocasionadi per os.

Pera sua part, es representants deth Conselh Generau e dera Generalitat expausèren es esfòrci amiadi a tèrme entà auançar ena reduccion des danhs enes explotacions ramadères en Pirenèu e era Val d’Aran. En aguest sens, eth conselhèr Bruna afirmaue que: “deth govèrn deth Conselh Generau d’Aran ençà auem amiat a tèrme diuèrses actuacions entà melhorar era convivéncia dera ramaderia e es grani carnivòrs, coma ei eth cas dera creacion des ajudes ath bestiar non retornat o era modificacion deth decrèt de danhs a fin d’aumentar eth valor indemnizable des atacs e equiparar-lo ath dera rèsta de comunitats vesies”.

Aguest escambi d’experiéncies entre administracions, ramadèrs e representants des juntes vesiaus met de manifèst eth compromís e eth besonh d’auançar conjuntament ena coexisténcia entre er os e era ramaderia. Per aguest motiu, e damb er objectiu de consolidar aguest escambi, s’a trasladat era invitacion a aguesti ramadèrs entà visitar explotacions a zònes d’os dera Val d’Aran e Catalunya.