Eth conselhèr d’Espòrts recep ath president dera Federacion Catalana de Ciclisme

abriu 26, 2024 Cabecera, Espòrts, Slider

  • Aguest ei eth prumèr contacte institucionau qu’eth Govèrn d’Aran manten damb aguesta Federacion entà desvolopar diuèrses accions amassa

Eth conselhèr d’Espòrts deth Conselh Generau d’Aran, Javier Cavero e eth president dera Federacion de Ciclisme de Catalunya, Joaquim Vilaplana, s’amassauen aguesta passada setmana ena sedença deth Govèrn Aranés entà escambiar prepauses de trabalh a cuert e miei tèrme. Ena amassada i assistien tanben representants des clubs qu’organizen pròves esportives en Aran (Pedals de Foc, Hard Bike, Royal Cycling, Vielha Cycling Tour e Aran Bike Park).

Toti eri an agut era oportunitat de trasméter ath president dera FCC es pròves qu’organizen, atau coma eth sòn desvolopament.

En paraules deth conselhèr Cavero: “s’a hèt a conéisher era prumèra via de comunicacion institucionau entà daurir ua pòrta de collaboracion atau coma es sinérgies”.

Ena amassada, se balhèc compde d’inquietuds per part dera institucion d’ahèrs tan importanti coma era neteja des varats des carretères. En aguest sens, Salvador Bigas, responsable de seguretat dera FCC, s’a comprometut a notificar ath Conselh era futura amassada damb Carretères tà tractar aguest ahèr. Cau remercar qu’era Val d’Aran depen tant de Ministèri de Fomento, tara nacionau N- 230, coma dera Generalitat , tara comarcau C-28.

Aguesta trobada en Aran ven precedida d’un prumèr contacte entre es dues institucions ena 27ª Festa d’Esport Català, organizada pera UFEC que se hec en Barcelona, a on era FCC s’aufric a visitar era Val d’Aran coma gèst d’apropament tà futures collaboracions.

Segontes Javier Cavero: “eth següent pas passe per crear ua taula de trabalh entà desvolopar es projèctes que se tractèren, entre eri remercar, per part dera Federacion, eth sòn interès en matèria de formacion de naui tecnics e promocion ena base der espòrt, ja qu’Aran compde damb era unica escòla de ciclisme des Pirenèus, Royal Cycling, entàs categories infantiles”.

Joaquím Vilaplana, notifiquèc: “era possibilitat de portar entà Aran quauqua pròva dera liga catalana en quinsevolh des modalitats “.

Comments are closed.