Eth conselhèr deth COI a realizat era visita tecnica acompanhat deth sindic d’Aran, Carlos Barrera e eth secretari generau der Espòrt dera Generalitat, Gerard Figueras
Se tracte d’ua prumèra presa de contacte entà avalorar es possibilitats dera candidatura olimpica d’iuèrn Barcelona Pirenèus
Vielha, 5 de seteme de 2018.- Eth conselhèr e antic director executiu des Jòcs Olimpics, Gilbert Felli, a realizat aué ua visita tecnica en representacion deth COI ena Val d’Aran coma prumèra presa de contacte entà avalorar es possibilitats dera candidatura olimpica Barcelona Pirenèus entara organizacion des Jòcs Olimpics d’iuèrn.
Eth conselhèr deth COI Gilbert Felli a estat arrecebut en Conselh Generau d’Aran per sindic d’Aran, Carlos Barrera e peth vicesindic e conselhèr d’Espòrts d’Aran, Luís Carlos Medina.
Pendent era visita Gilbert Felli a mantengut un dinar de trabalh ath que tanben a assistit Gerard Figueras, secretari generau der Espòrt dera Generalitat, Ricard Font, president de Ferrocarrils dera Generalitat, May Peus, president dera RFEDI (Reau Federacion Espanhòla d’Espòrts d’Iuèrn), Oscar Cruz, president dera FCEH (Federacion Catalana d’Espòrts d’Iuèrn), Anna Díaz, conselhèra de Torisme d’Aran, Josep Lluís Farrero, president deth Conselh Comarcau dera Nauta Ribagorça, Aureli Bisbe, president de Baqueira Beret e Xavier Ubeira, director comerciau de Baqueira Beret.
Eth sindic d’Aran Carlos Barrera expliquèc qu’era visita deth conselhèr deth COI Gilbert Felli se tracte d’ua prumèra presa de contacte damb eth territòri deth Pirenèu e de visualizacion deth país entà escotar a toti es actors qu’an participat enes reünions de trabalh sus era possibilitat dera presentacion d’ua candidatura olimpica de Barcelona Pirenèus. Eth sindic d’Aran a manifestat er entosiasme que represente un projècte illusionant entara Val d’Aran, coma ei eth hèt de poder acuélher uns Jòcs Olimpics d’Iuèrn. Carlos Barrera, destaquèc qu’era grana qualitat der entorn naturau deth Pirenèu encastre damb era naua filosofia deth COI qu’ues olimpiades an d’èster respetuoses damb er entorn, sostenibles e de recuperacion dera melhora tradicion des espòrts de nhèu e gèu.
Eth sindic d’Aran a destacat que Gilbert Felli coneishec era Val d’Aran mejançant eth Tour de França quan er an 2016 Aran acuelhec era gessuda dera 9au etapa dera ronda gala, en tot afiançar d’aguesta manèra qu’era escomesa dera Val d’Aran per acuélher grani eveniments esportius ei era melhor manèra de dar-se a conéisher en tot eth mon.
Pera sua part Gilbert Felli s’a reafirmat en cambi de filosofia deth COI en çò que tanh ara organizacion des Jòcs Olimpics que consistís ena sostenibilitat en tot profitar es projèctes autoctòns, damb mès flexibilitat, e sense eth besonh d’auer de bastir granes infrastructures. Gilbert Felli didec qu’escotarà totes es idèes e prepauses entà hèr que vagen tara bona direccion.
Eth secretari generau der Espòrt dera Generalitat, Gerard Figueras destaquèc que dempús dera prumèra reünion dera taula dera candidatura Barcelona Pirenèus deth darrèr mes de junh ena qu’i participèren Juan Antonio Samaranch, vice-president deth COI e Pere Miró, director generau adjunt, s’inicièc eth dialòg entre eth Comitat Olimpic Internacionau e era candidatura catalana ena qu’eth prumèr pas ei aguesta visita deth conselhèr deth COI Gilbert Felli, entà obtier ua prumèra impression generau sus es possibilitats d’organizar uns Jòcs Olimpics d’Iuèrn. Figueras s’a mostrat pleaments convençut que Barcelona Pirenèus pòt acuélher uns Jòcs Olimpics damb eth supòrt, eth conselh e er acompanhament deth Comitat Olimpic Internacionau.
Eth conselhèr deth COI Gilbert Felli a realizat ua visita tecnica de tres dies en Catalonha ena qu’a visitat es desparières sedences e infrastructures que poderien hèr part dera candidatura Barcelona Pirenèus.
