Eth Conselh Generau d’Aran e er Ajuntament de Vielha e Mijaran accèpten de bon grat entrar ath Consell, ua decision que serà ratificada peth Plen deth patronat es pròplèus mesi.

Aguest maitin, Albert Royo, secretari generau deth Consell de Diplomàcia Pública de Catalunya (DIPLOCAT) a convidat formauments ath Conselh Generau d’Aran e ar Ajuntament de Vielha e Mijaran a èster naui membres deth DIPLOCAT.

Carlos Barrera, sindic d’Aran, a arregraït er aufriment deth DIPLOCAT e a manifestat era sua volontat de formar-ne part en tot destacar que “coma país, ei important entara Val d’Aran hèr conéisher era nòsta identitat. Enguan ath delà, compdam damb era reconeishença der Institut d’Estudis Aranesi coma academia e autoritat lingüistica der occitan, aranés en Aran, que darà encara mès enfasi ara pluralitat de Catalunya, e mostrarà que non i a cap territòri en Euròpa coma Aran”

Pera sua banda, Àlex Moga, alcalde de Vielha e Mijaran, tanben a manifestat era volontat de formar part deth DIPLOCAT, en tot ahíger qu’ “éster membres de DIPLOCAT mos ajudarà a explicar era realitat nacionau aranesa a Euròpa e ath mon.”

Fin finau, Albert Royo, secretari generau deth Consell de Diplomàcia Pública de Catalunya, a destacat, en tot referir-se as dues institucions, qu’era volontat deth DIPLOCAT ei somar membres e represenatcion dera societat catalana entà projectar-se en mon: “era soma d’aguestes institucions ath DIPLOCAT mos permeterà presentar-mos en mon coma un país plurau, damb ua realitat nacionau singulara en tot èster representada pes principaus institucions araneses: eth Conselh Generau e er Ajuntament de Vielhae Mijaran”. Royo a explicat qu’era incorporacion des dues institucions serà ratificada ena pròplèu reünion plenària. Tanben a destacat er interès deth Consell de Diplomàcia Pública de Catalunya a projectar internacionauments Aran, era sua lengua e era sua cultura: “damb aguest objectiu, dispausaram d’ua version dera web de DIPLOCAT ena lengua aranesa es pròplèus mesi”.

Era natura consorcial deth DIPLOCAT li permet presentar-se en mon coma ua institucion plurau, formada pes principaus institucions publiques, empresariaus, sociaus e academiques de Catalunya. Damb aguesta prepausa, DIPLOCAT passarà a includir entre es sòns membres es principaus institucions que representen Aran coma realitat nacionau.

Eth Consell de Diplomàcia Pública de Catalunya ei ua institucion creada en noveme der an 2012 coma un consòrci public-privat qu’a per objectiu explicar Catalunya en mon e subervier era opinion publica internacionau entà per’mor de melhorar era imatge e eth prestigi deth país en exterior, en tot crear ligams e relacions de confidança entre es ciutadans e es institucions de Catalunya, e es des auti païsi. Entre es sòns membres i a era Generalitat de Catalunya, es Ajuntaments e es Deputacions des quate caps-lòcs catalans, entitats municipalistes, associacions empresariaus, sindicats, escòles de negòcis, universitats, e entitats sociaus e esportiues.