Vielha, 23 de noveme de 2017.- Eth Plen deth Consòrci Leader Pirenèu Occidentau, presidit per Joan Ubach, a aprovat eth pressupòst entà er an 2018 ena session ordinària en Conselh Generau d’Aran.
Eth pressupòst deth Consòrci entà er an 2018 serà de 928.000 €, destinadi a finançar projèctes empresariaus generadors d’activitat economica en Pallars Jussà, Pallars Sobirà, Alta Ribagorça e era Val d’Aran.
Er an 2015 eth Govèrn d’Aran artenhec materializar era incorporacion dera Val d’Aran en programa Leader Pirenèu Occidentau que li cau supausar un impuls important ath desvolopament economic deth territòri.
Era conselhèra de Torisme e Desvolopament Economic d’Aran, Anna Díaz, qu’a participat en Plen, a avalorat fòrça positiuaments es dus ans d’experiéncia laguens eth programa Leader Pirenèu Occidentau per part des enterpreses e institucions araneses que i an agut accès e an animat as micro, petites e mejanes enterpreses interessades a contunhar en tot participar-i, donques pòden auer era possibilitat d’accedir a finançament pes sòns projèctes e contribuïr ara generacion de riquesa e lòcs de trabalh ena Val d’Aran.
Pendent eth Plen, tanben s’a informat dera situacion dera convocatòria Leader 2017, que finalize eth pròplèu 30 de noveme e des projèctes de cooperacion presentadi.
En aguest Plen, celebrat ena Val d’Aran, s’a informat des ajudes corresponentes der an 2016 damb un totau de 33 expedients certificadi per impòrt de 863.000 €. D’aguesti expedients 8 corresponen a projèctes dera Val d’Aran.
Eth Departament d’Agricultura, Ramaderia, Pesca e Alimentacion (DARP) dera Generalitat de Catalonha, a seleccionat 11 Grops d’Accion Locau (GAL) Leader, entà aplicar eth desvolopament locau participatiu Leader en marc deth Programa de Desvolopament Rurau (PDR) de Catalonha 2014-2020.
Un des objectius principaus deth GAL ei era dinamizacion territoriau e era divulgacion des sòns projèctes mès estrategics e bones practiques, amassa damb era gestion des ajudes, que convòque annauments eth DARP entà fomentar era realizacion d’inversions que genèren activitat economica enes zònes ruraus e fomenten era creacion e/o mantenença de lòcs de trabalh, principauments de hemnes e de joeni, es accions de melhora des procèssi de transformacion e comercializacion des productes agraris, creacion e desvolopament de microenterpreses, foment d’activitats toristiques, e conservacion e melhora der auviatge rurau.
Des ajudes europèes Leader se’n pòden beneficiar toti es particulars dera Val d’Aran interessadi en impulsar un projècte empresariau generador d’activitat economica, atau coma es ajuntaments dera Val d’Aran.
Es persones interessades se pòden informar sus es ajudes Leader ena sedença deth Conselh Generau d’Aran en tot demanar ora damb Judit Jaquet: j.jaquet@aran.org o en tel. 973 64 18 01.
Mès Informacion en:
http://www.leaderpirineuoccidental.cat/ajuts-leader/documentacio-i-descarregues/
