Era Facultat de Veterinària dera UAB confirme qu’era ossa moric per un traumatisme accidentau

Eth Departament d’Agricultura, Ramaderia, Pesca, Alimentacion e Medi Naturau dera Generalitat de Catalunya avale era intervencion realizada eth tot moment pes veterinaris de Forestal Catalana, S.A empresa adscrita ath Departament deuant es acusacions qu’a arrecebut dera entitat ecologista Ipcena.

Forestal Catalana, coma mejan pròpri, realize e execute es accions que li son manades peth Departament d’Agricultura, Ramaderia, Pesca, Alimentacion e Medi Naturau.

En cas des accions veterinàries damb era ossa Auberta, aguestes sigueren acordades per consens e acordades en Grop de Trabalh de conservacion der os brun des Pirenèus, grop constituït per tecnics responsables der os brun des Govèrns espanhòus, francés, andorran, navarrès, aragonés, catalan e aranés. Totes es accions damb era ossa, includides es veterinàries, sigueren executades per ua equipa pluridisciplinari e conjunt de tecnics deth Conselh Generau d’Aran, dera Generalitat de Catalunya e dera Office National dera Chasse et de la Faune Sauvage, jos era direccion tecnica deth Conselh Generau d’Aran.

Jos aguestes directrizes, Forestal Catalana destinèc ara execucion d’aguesti prètzhèts a un des veterinaris de major experiéncia en maneig e suenh de fauna sauvatja de tota Catalonha, eth quau;

• Compde damb ua ampla experiéncia ena atencion de 7.000 casi de fauna sauvatja pendent es darrèri cinc ans enes Centres de Recuperacion de Fauna Sauvatja dera Generalitat de Catalunya, damb mès de 500 cirurgies e en tot abastar mès de 200 espècies diferentes.

• Pendent aguest temps a estat eth veterinari responsable dera mantenença des 2 exemplars d’os brun qu’era Generalitat de Catalunya mantén en captivitat en un des dus Centres de Fauna Sauvatja mencionadi.

• Enguan, pendent era prumèra setmana de seteme a participat actiuaments en maneig e marcatge des 2 exemplars d’os brun mencionat entath sòn posterior traslat a un santuari d’ossi bruns en Ongria.

• Tanben a estat çò de responsable dera prumèra anestèsia e examen clinic dera ossa Auberta, eth passat 27 de mai.

• A collaborat e trabalhat en d’auti nuclèus zoològics qu’acuelhen fauna sauvatja protegida o fauna cinegètica d’Espanha (Parc Zoològic de Barcelona, Centres de Fauna Sauvatja de Toledo, de Saragossa, Cuenca e Madrid) atau coma en d’auti de França (seccion de gestion de fauna deth Parc National dera Vanoise), Itàlia (Centre de gestion de fauna sauvatja CERIGEFAS, Rore), Estats Units (Raptor Center dera Universitat de Veterinària de Saint Paul, Minnesota) e Canadà (Centre de Recuperacion de Fauna Sauvatja de Toronto).

• A mantengut ua estreta collaboracion damb eth Servici d’Ecopatologia de Fauna Sauvatja dera Facultat de Veterinària dera UAB (Departament qu’a hèt era necròpsia dera ossa), pendent tota era sua formacion professionau (captura de diuèrses espècies d’ungulats Sauvatges, necròpsies, illustracion de manuaus educatius entath madeish departament, entre d’auti).

• Que justaments aguest veterinari siguec prepausat peth Grop de trabalh de conservacion der os brun enes Pirenèus, entà hèr part dera equipa pluridisciplinar e conjunta d’accion damb era ossa Auberta.

Era accion d’implantacion der emissor intraperitoneal (laguens der abdomen der animau) realizat en cas dera ossa Auberta, arresponec a ua decision des tecnics expèrts deth Grop de Trabalh de conservacion der os brun enes Pirenèus, e malastrosaments, segons s’establís en informe dera necròpsia deth Servici d’Ecopatologia dera Fauna Sauvatja dera Facultat de Veterinària dera UAB, era causa dera mòrt siguec un traumatisme accidentau ena zòna ventral der animau qu’auie ua hernia incisional, que li ocasionèc un quadre agut hemorràgic e necrosi deth budèth prim.