Eth conselhèr d’Agricultura, Ramaderia e Medi Naturau d’Aran, Jose E. Arró, a signat un convèni damb es presidents dera Agropacion de Defensa Sanitària d’Ovin-Crabum, dera “Associacion de criadors deth shivau de raça “Cavall Pirinenc Català” e dera Associacion Professionau Agropecuària dera Val d’Aran.

Er objècte d’aguesti convènis ei establir es bases de collaboracion entre eth Conselh Generau d’Aran e aguestes Agropacions e Associacions dera Val d’Aran entà finançar era prestacion des servicis veterinaris, corsi de formacion, assisténcia a hèires, identificacion animau e tractament veterinari.

Eth Conselh Generau d’Aran se compromet, mejançant era signatura des Convènis, a realizar es accions següentes:

– Dar ajuda entath mantieniment des condicions tecniques e sanitàries des explotacions ramadères existentes.

– Collaborar damb aguestes Agropacions e Associacions dera Val d’Aran ena redaccion des estudis prealables de viabilitat des diferents projèctes de naui bastiments prepausadi pes professionaus ramadèrs.

Eth Conselh Generau d’Aran aportarà quinze mil èuros (15.000,00 €) a cada Associacion e Agropacion, s’a incrementat 3.000€ per associacion.

En paraules deth conselhèr d’Agricultura, Ramaderia e Medi Naturau d’Aran, Jose E. Arró “eth Departament d’Agricultura, Ramaderia e Medi Naturau deth Conselh Generau d’Aran -en sòn trabalh de supòrt ara ramaderia- vò ajudar ath desvolopament e conservacion dera profession agropecuària ena Val d’Aran, en tot incrementar es ajuts des subvencions autrejades enquiath 2014”.