• Eth secretari de Salut Publica dera Generalitat de Catalunya, Josep Maria Argimon, a confirmat ena ròda de premsa d’aguest maitin que 5 des 12 seqüenciacions amiades a tèrme en Aran corresponen ara variant britanica deth COVID-19 e a hijut que s’amiaràn a tèrme mès mòstres entà auer mès donades.

Eth departament de Salut dera Generalitat de Catalunya, a confirmat aguest maitin, a trauès deth secretari de Salut Publica, era deteccion de cinc casi de COVID-19 corresponents ara nomentada variant britanica.

Enes diferents contactes qu’era sindica d’Aran a mantengut damb era conselhèra de Salut dera Generalitat, dejà convengueren era seqüenciacion de mòstres prenudes en Aran entà confirmar era preséncia d’aguesta variant. Totun, en moment d’eméter aguest comunicat, eth Conselh Generau d’Aran non a rebut informacion oficiau sus aguesta confirmacion.

Rebrembam qu’es mesures preventives establides pes autoritats sanitàries son es madeishes deuant aguesta variant: mascareta, distància, igiena, ventilacion e reduccion dera interaccion sociau