Eth secretari de Salut Publica deth Departament de Salut dera Generalitat de Catalunya, Antoni Mateu e eth president deth Servici Aranés de Bénéster e Salut (SABS) e sindic d’Aran, Carlos Barrera, signèren eth convèni de collaboracion entre ambdues institucions en matéria de salut. D’aguesta manèra, s’establís un marc de collaboracion conjunta entar emparament e era promocion dera salut entà protegir e promòir era salut des persones, previer malauties e suenhar era vigilància dera salut publica.

Atau, eth personau deth SABS arreceberà assessorament en matéria de salut publica, ath delà de poder participar enes programes de formacion contunhada dera Generalitat de Catalunya.

“Eth convèni qu’auem signat des deth SABS damb eth Departament de Salut dera Generalitat de Catalunya, a de servir coma mapa de rota entà hèr ben es causes ena salut publica. Trabalham entà melhorar era qualitat dera salut des nòsti ciutadans, e damb aguest convèni velharam peth sòn emparament”, comentaue eth sindic d’Aran, Carlos Barrera.

“Enes pròplèus mesi establiram ues “rotes saludables” per desparièrs municipis dera Val d’Aran, damb es qu’era gent poderà hèr exercici, e melhorar era sua salut”, ahigie Barrera.

Eth convèni non implique cap tipe d’inversion economica per part des dues parts e aurà ua durada de quate ans. A compdar d’alavetz se prorogarà automaticaments per periòdes annaus. Se constituirà ua Comission de Seguiment deth convèni, formada per dus representants deth Departament de Salut e dus deth SABS.

Fin finau, eth Departament de Salut e eth SABS tanben acordèren qu’eth sindic d’Aran, Carlos Barrera, passe a formar part deth Consell de Participacion de l’Agència de Salut Publica de Catalunya. Un organ de participacion, assessorament e consulta e seguiment sus ahèrs restacadi damb era salut publica e era salut en generau.