Er acòrd, qu’aurà ua durada de 4 ans, preve era creacion d’ua Comission de Seguiment
Vielha, 12 de març de 2019.- Promòir era salut publica ena Val d’Aran ei eth principau objectiu deth nau convèni signat entre eth Departament de Salut e eth Servici Aranés de Benèster e Salut (SABS), organisme deth Conselh Generau d’Aran. Er acòrd a ua durada de 4 ans e vò garantir eth suenh dera salut publica; era promocion dera salut individuau e collectiva; era prevencion dera malautia e era proteccion dera salut.
Eth convèni l’an signat ena sedença deth Conselh Generau d’Aran, pera conselhèra de Salut, Alba Vergés e eth sindic d’Aran, Carlos Barrera, que dempús dera signatura an visitat es installacions der Espitau dera Val d’Aran e dera residéncia geriatrica Sant Antoni de Vielha. Pendent era visita, era conselhèra de Salut a pogut conéisher eth desvolopament des òbres d’ampliament der espaci quirurgic e deth laboratòri der espitau dera Val d’Aran.
Aguest nau convèni s’executarà a trauès dera Secretaria de Salut Publica e deth SABS. En aguest sens, era Secretaria de Salut Publica facilitarà diuèrsi servicis ath SABS, coma, er assessorament ena matèria de salut publica; eth supòrt metodològic entà abordar es besonhs era salut e sociaus des persones d’Aran o er includiment deth SABS ena gestion des incidéncies que podessen afectar ath territòri dera Val d’Aran.
Per un aute costat, era Secretaria de Salut Publica tanben facilitarà ath SABS er accès as laboratòris deth Departament de Salut entà hèr pròves analitiques atau coma era informacion sus es diferenti programes de salut publica deth Departament de Salut.
Eth convèni, que non implicarà cap despena economica entà cap des dues parts, preve era constitucion d’ua Comission de Seguiment. Aguesta comission serà formada per dus representants deth Departament de Salut e per dus deth SABS, que s’amassaràn, aumens, un còp ar an.
Aguest acòrd, agranís era collaboracion jà existenta entre es dues administracions ara fin d’aumentar era eficacitat e era eficiéncia en airau dera salut publica. Es dues administracions, eth Departament de Salut e eth Conselh Generau d’Aran, compartissen er objectiu d’optimitzar e melhorar era prestacion de servicis ena matèria de salut publica entà protegir e promòir era salut des persones, previer era malautia e susvelhar deth suenh dera salut publica.
