Vielha, 22 de mai de 2019.- Eth conselhèr d’Interior, Miquel Buch, e eth sindic d’Aran, Carlos Barrera, an oficializat aué en Conselh Generau d’Aran, er acòrd sus es procediments de collaboracion en traspàs dera gestion des servicis d’emergéncies e proteccion civila en airau dera prevencion, er escandiment de huècs e sauvaments e rescats de montanha.
Aguest acòrd da forma a un nau modèl de gestion integrau d’emergéncies en Aran en que s’establís eth marc e es mecanismes de coordinacion operativa e de gestion foncionau.
Segontes eth conselhèr, “damb aguest acòrd se homologue eth Aran a toti es territòris de Catalonha mès ath delà se li da un tractament diferenciau. Era Generalitat harà ua transferéncia economica entà que eth Conselh Generau gestione eth servici, donques ei qui a totes es competéncies e singularitat que li autrege era Lei d’Aran”, a explicat.
Actuauments, eth marc organizatiu ei establit en article 72 dera Lei 1/2015, deth 5 de hereuèr, deth regim especiau d’Aran (LREA). Segontes aguest, eth Conselh Generau d’Aran, exercie era competéncia de gestion des servicis d’emergéncies e proteccion civila, qu’includie era planificacion e era execucion de mesures relatives as emergéncies, transpòrt sanitari, rescats de montanha, proteccion civila, es servicis de prevencion e escandiment de huècs.
Damb aguest acòrd, se culminarà eth procès de transferéncia totau des servicis de prevencion, escandiment de huècs e sauvaments dera Generalitat de Catalonha ath Conselh Generau d’Aran. Per açò, se preve un periòde de transicion en que s’an establit uns mecanismes transitòris de prestacion de servicis e transferéncies pressupostàries que permeten era plea implementacion de competéncies transferides a compdar deth 1 de gèr de 2023.
Miquel Buch a manifestat èster “força content” d’auer arribat ad aguest acòrd, “ei un des objectius que me merquè coma conselhèr”. Ath delà, eth titular deth Departament a ponut de manifèst que damb aguesta iniciatiua se da compliment “a un des objectius que mos auem mercat coma Govèrn, qu’ei que tot eth país age es madeishi servicis, que non i age catalans de prumèra e de dusaua. En cas des Pompièrs, que totes es comarques de Catalonha e Aran, agen un parc de prumèra gessuda, daurit 24 ores es 365 dies der an, en tot trabalhar. En aguest sens, eth conselhèr a arrebrembat que s’a començat en Aran pera singularitat administrativa e politica qu’a damb era Generalitat de Catalonha.
Pera sua part, eth sindic d’Aran, Carlos Barrera, a destacat era importància qu’a aguest acòrd entar Aran, qu’a dit “culmine un long periòde de tres ans de negociacions damb eth Govèrn dera Generalitat entà arténher eth nau modèl integrau dera gestion des emergéncies en Aran “. En aguest sens eth sindic d’Aran a explicat qu’enes darrèri dies ena estructura de Pompièrs Emergéncies s’an ja començat es procèssi de seleccion des caps d’equipa entà auançar en aguest nau modèl en Aran, e remerquèc que se tracte “d’un modèl singular de gestion integrau des emergéncies en Catalonha e en Espanha.
Era estructura serà formada per 44 persones damb contracte laborau que se basarà en gran collectiu de pompièrs volontaris qu’a era Val d’Aran enes tres parcs existents de Viella e Mijaran, Les e Bossòst.
Cau arrebrembar qu’eth plen deth Conselh Generau d’Aran celebrat ager aprovèc era creacion des lòcs de trabalh de Major de Pompièrs e Adjunt a direccion tecnica de prevencion, escandiment de huècs e sauvaments. En periòde transitòri, eth comandament correspon a un foncionari damb era categoria d’inspector deth còs de bombers dera Generalitat de Catalonha, e qu’eth Conselh arreconeish damb era denominacion de Major, que depenerà organicaments dera Generalitat de Catalonha e funcionauments deth Conselh Generau d’Aran, pendent aguest periòde transitòri.
Pendent aguest periòde de transicion, es equipaments e era dotacion de recorsi umans entà assolidar era plantilha e executar es prètzhèts dera prevencion, escandiment de huècs e sauvaments, seràn aqueridi peth Departament d’Interior.
Pendent era visita ara Val d’Aran, eth conselhèr s’a desplaçat ath parc de Pompièrs de Viella e Mijaran, a on s’amassèc damb eth director Tecnic de Pompièrs Emergéncies, Franc Cardeñes, atau coma damb desparièrs efectius deth Parc, e damb es caps des parcs dera Agropacion de Pompièrs Volontaris de Bossòst, Les e Vielha e Mijaran.
Eth titular deth Departament tanben a visitat eth Comissariat dera Policia dera Generalitat-Mossos d’Esquadra en Vielha e Mijaran. Pera tarde, eth conselhèr a contunhat era visita damb ua session tecnica en Centre de Contraròtle deth Tunèl de Vielha.
Prèviaments, peth maitin, eth conselhèr tanben s’a desplaçat ath Centre de Cooperacion Policèra e Termierèr hispano-francés de Melles-Pont de Rei (França).
