Vielha, 19 de seteme de 2018.- Eth director generau de Torisme dera Generalitat, Octavi Bono, se desplacèc era setmana passada enquiara Val d’Aran entà visitar es refugis de montanha dera Honeria, en Sant Joan de Toran, e eth dera Artiga de Lin.

Octavi Bono realizèc era visita acompanhada pera conselhèra de Torisme d’Aran, Anna Díaz, e peth conselhèr de Territòri, José Antonio Boya. Abantes de finalizar era visita eth director generau de Torisme s’amassèc damb eth síndic d’Aran, Carlos Barrera.

Era conselhèra de Torisme d’Aran, Anna Díaz, a explicat qu’un des objectius dera sua conselheria se centre en potenciar ath maxim er entorn naturau dera Val d’Aran e mès en concrèt eth deth Baish Aran e era zòna a on se tròbe eth refugi dera Honeria ena Val de Toran, motiu qu’eth director generau de Torisme dera Generalitat volec coneishesse eth trabalh que des deth Conselh Generau d’Aran s’amie a tèrme en aguest encastre.

Anna Díaz tanben expliquèc que des de Torisme Val d’Aran, se trabalhe damb er objectiu d’enfortir encara mès es relacions entre Foment Torisme Val d’Aran e era Agéncia Catalana de Torisme. En aguest sentit, Díaz a arrebrembat que Foment Torisme Val d’Aran ja ei part deth Conselh de Direccion dera Agéncia Catalana de Torisme, mès que er objectiu ei establir relacions a nivèu bilaterau entà enfortir totes es possibles linhes de collaboracion.

A mès, era conselhèra Anna Díaz anoncièc qu’enes pròplèus dies se haràn publiques es numeròs d’aucupacion otelèra dera sason toristica d’ostiu ena Val d’Aran, qu’auancèc, qu’an aumentat respècte der ostiu passat. Era conselhèra tanben anoncièc qu’enes pròplèus setmanes s’amassarà damb es responsables deth Grèmi d’Ostalaria dera Val d’Aran e damb es empresaris deth sector en Aran, entà conéisher de prumèra man es sues impressions dera sason d’ostiu e auançar enes objectius comuns entara pròplèu sason d’iuèrn ena Val d’Aran.