Dempús de competir en DORADO (Andòrra), a on sofric ua casuda fòrça fòrta, Aymar Navarro, se tròbe en plea forma.

Aguesta dimenjada, deth 14 ath 18 de març, se celebrarà era Nendaz Freeride 2014 en Soïssa, ua pròva qu’acuelh as melhors riders deth circuit deth Freeride World Qualifier (FWQ), e a on participarà eth joen freerider aranés, Aymar Navarro.

Per setau an consecutiu, eth FWQ arribarà ena Nendaz, ua parada importanta laguens deth circuit pr’amor qu’ei catalogada damb quate estels, d’un maximal de quate. Entre totes es competicions s’amassaràn lèu de 150 riders de diferenti cornèrs deth planeta.

Era pròva compdarà damb ua ampla cobertura mediatica e poderà seguir-se per Internet. Se demore qu’un an mès aguesta cita concentrada ath miei des Alps sigue un exit d’assisténcia.

Navarro, abans de gésser cap a Soïssa a declarat “demori que pogue hèr un bon papèr, per desir e motivacion non serà. Eth dissabte demori poder classificar-me e lutar ena finau deth dimenge”.

Pendent aguesta setmana, Aymar Navarro a grauat ena Val d’Aran un reportatge damb ua productora Italiana, eth quau s’emeterà en Itàlia eth PrimeTime.

Ath delà, era setmana passada emeteren un aute reportatge en Tv3: http://www.Espòrt3.cat/video/4940691/eth-freeride-damb-aymar-navarro

Aymar Navarro, a signat un convèni damb eth Conselh Generau d’Aran entà promòir era destinacion toristica esportiua Val d’Aran peth mon, representada ena imatge e en es valors deth freerider. “Qui melhor qu’es nòsti joeni esportistes professionaus aranesi entà representar eth nòste país e eth sentiment d’identitat” manifestèc Carlos Barrera, sindic d’Aran.