• Eth Conselh Generau d’Aran, a trauès deth trabalh coordinat entre eth Centre de Lauegi d’Aran e eth Departament de Lengua, a amiat a tèrme era revirada ar aranés deth glossari EAWS, eth glossari europèu mès complet deth mon sus era nhèu e es lauegi

Pendent aguesta tardor, en tot premanir era sason d’iuèrn 2022-23, eth Centre de Lauegi d’Aran e eth Departament de Lengua deth Conselh Generau d’Aran an trabalhat coordinadaments entà revirar ara lengua aranesa eth glossari europèu EAWS, ua iniciativa des Servicis europèus de prevision de lauegi.

Aguest glossari ei eth mès complet deth mon sus era nhèu e es lauegi. Actuauments, damb mès de 100 tèrmes estandardizats ja disponibles en 12 idiòmes. Un recors en actualizacion e creishement constants.

Cau rebrembar que des der iuèrn 2020-21 eth bulletin de perilh de lauegi entara Val d’Aran se renauic fòrça en ua naua plataforma web damb es objectius d’adaptar-lo as estandards e recomanacions tecniques europèes e ath madeish temps auer era traduccion automatica a 7 lengües europèes, includida era lengua aranesa.

Er usatgèr, quan consulte eth bulletin, tostemps se pòt referir ath glossari en idiòma qu’age de besonh entà compréner eth significat des tèrmes e expressions tecniques que s’utilizen enes descripcions deth tèxte.

S’es nheuades previstes se confirmen, era sason de prediccion de lauegi damb emission de bulletins diaris ja poirie començar aguesta dimenjada, era darrèra de noveme.