Es empreses de Les Neoelectra Aran e Carboneco parèren era sua activitat eth passat mes de març de 2014 e Caviar Nacarii contunhe damb era sua produccion de caviar, mès tanben ei immergida, coma es dus anteriors, en un concors de creditors e acabarà barrant se non se produsís un cambi de darrèra ora. Aguesta situacion ei provocada dirèctaments peth cambi de nòrma des Energies Renovables deth passat en hereuèr de 2014, impulsat per actuau govèrn der Estat.

Atengut era situacion d’ERO d’extincion de contractes e eth barrament previsible d’aguestes tres empreses emblematiques de Les e era importància qu’an entara Val d’Aran, es trabalhadors/es e eth sindicat dera UGT-Terres de Lleida an convocat ua concentracion ena boca nòrd deth Tunèl de Vielha, entà deman diuendres, dia 10 d’octobre, entàs 11h30 e enquiàs 13h30.

Ara concentracion ei prevista era assisténcia deth vicesindic d’Aran, Luís Carlos Medina, era conselhèra de Torisme, Comèrç e Consum d’Aran, Anna Díaz, ath delà de trabalhadors/es des plantes de Les, atau coma representants des plantilhes d’Aliaga (Teròl), Òsca e deth centre logistic de Barcelona, ath delà de trabalhadors de Navarra e vesins e vesies dera Val d’Aran.

En paraules deth vicesindic d’Aran, Luís Carlos Medina, “eth Govèrn d’Aran, a trauès des sòns representants, sostien as empreses e as trabalhadors en aguest procès contra eth barrament dera Centrau de Les”.