Vielha, 20 de deseme de 2018.- Eth Conselh Generau d’Aran a destinat 50.000€ as trabalhs de melhora deth camin vesiau d’accès ath nuclèu d’Arres de Sus des deth nuclèu de Bossòst.

Es trabalhs an consistit en apàrii de dus trams deth camin vesiau, eth prumèr que s’inície en carrèr d’Arres enquiath horcadís damb era pista forestau deth Bòsc Ombrèr, e eth dusau, eth tram deth camin vesiau entre eth horcadís dera pista Margalida enquiath horcadís damb era pista forestau deth Bòsc Ombrèr.

Es trams deth camin presentauen er asfalt damb fòrça usura, horats e henedures, provocades pera aigua qu’an accelerat eth deteriorament. Era accion a consistit en apariament der asfalt deth camin, deth paviment der interior de quauques corbes e era estabilizacion de dus ensorraments en que s’a hèt ua catacion de longitud de dus mètros e prigondor de tres mètros en prumèr e de sèt mètros e prigondor de tres mètros en dusau, entà asetar era esculhèra damb blòcs de pèira granitica de 800 a 1.200 kg de pes, plaçadi damb pala cargadora.

Aguestes accions se junhen ara seguida d’accions de reequilibri territoriau qu’a amiat a tèrme eth Conselh Generau d’Aran pendent enguan 2018.

En aguest sentit cau arrebrembar qu’eth Govèrn d’Aran a prevista ua inversion de 48.000€ destinada ath condicionament des mines d’Arres e ara melhora deth camin d’accès as madeishes laguens eth projècte d’Experiéncia minaire de nauta montanha ena Val d’Aran.

D’aguest pressupòst totau, 31.250€ provien des ajudes destinades ara aplicacion deth desvolopament locau participatiu Leader en marc deth programa de desvolopament rurau de Catalonha 2014-2020 corresponents ara convocatòria 2017 deth Departament d’Agricultura, Ramaderia, Pesca e Alimentacion dera Generalitat de Catalonha.

Era Val d’Aran a estat istoricaments ua zòna d’extraccion de mineraus. A principis deth sègle XX s’inicièc era explotacion deth minerau de zinc ena zòna d’Arres e de Bossòst.

En 1912, era Mina Victoria ja ère en plea explotacion, e extrège ath torn d’ueitanta tones de minerau brut per dia, e se metèc en foncionament un lauader de mineraus en Bossòst. Ena mina trabalhauen ath torn de 100 e 150 persones, repartides entre er interior e er exterior des galaries.

Ar esclatar era Guèrra Civiu (1936-1939), se suspeneren es trabalhs. En 1949 se reinicièc era explotacion, enquia 1953, quan era baishada deth prètz deth zinc e era fauta de man d’òbra provoquèren eth barrament definitiu des mines.

En 2004 era Mina Victoria se dauric ath public dempús de recuperar e restaurar part des sues infrastructures e entà que se podessen visitar. Ath tractar-se d’ua explotacion minaire de nauta montanha, se prepausèc era visita coma ua rota de senderisme, a on eth païsatge e er entorn complèten es atractius qu’apòrte era visita ara explotacion minaire.