• Aguest maitin era sindica d’Aran, acompanhada deth conselhèr de Governacion, a recebut ath conselhèr de Territòri dera Generalitat damb qui an tractat, entre d’auti, dera melhora dera carretèra C-28, tara qué es pressupòsti dera Generalitat tà aguest 2023 ja contemplen ua partida entà elaborar eth projècte de melhora.

• Pendent era trobada an acordat crear ua taula der Abitatge, ena linha de trabalh encetada damb era Agenda dera Mobilitat Sostenibla d’Aran, entà trabalhar conjuntament, damb era implicacion des ajuntaments aranesi, entà solucionar era manca de viuenda assequibla en nòste territòri e abordar era grèu problematica der accès ara viuenda en Aran.

• Era sindica d’Aran a trasladat ath conselhèr de Territòri eth besonh qu’eth Conselh Generau d’Aran artenhe, atau e coma mandate era Lei d’Aran, mès competéncies dotades coma cau en aguest airau entà poder desvolopar politiques d’impacte dirècte qu’ajuden a melhorar er accès a ua viuenda digna e accessible en Aran.

• Atau madeish, es de melhora dera C-28, e era sindica d’Aran e eth conselhèr de Territòri s’an emplaçat entà qu’andús govèrns trabalhen conjuntament entà arténher ua melhora dera seguretat viau en aguesta via e ua transicion entà un modèl de mobilitat mès sotenible.

Aguest maitin, era sindica d’Aran, Maria Vergés, e eth conselhèr de Governacion, Amador Marqués, an recebut ena sedença deth Conselh Generau d’Aran ath conselhèr de Territòri dera Generalitat, Juli Fernàndez, damb qui an tractat diuèrses qüestions qu’infloïsen de forma dirècta en territòri, coma era problematica dera viuenda o er estat dera C-28, entre d’auti ahèrs.

“Deth Conselh Generau d’Aran ençà auem trasladat ath conselhèr era nòsta preocupacion deuant dera grèu situacion de manca de viuenda en Aran, qu’ei ua qüestion que reclame solucions urgentes” manifestaue era sindica d’Aran, en tot híger que: “deth govèrn d’Aran ençà auem iniciat era elaboracion d’un Plan d’Abitatge, ena linha deth Plan Sectoriau d’Abitatge dera Generalitat, mès ei de besonh ampliar es nòstes competéncies en aguest ambit e que siguen dotades economicaments coma cau, entà desvolopar politiques que faciliten er accès a ua viuenda digna e accessible. Sense desbrembar que, atau e coma mèrque er article 137 der Estatut d’Autonomia de Catalunya, era competéncia exclusiva en matèria d’abitatge correspon ara Generalitat”.

En aguest sens, er article 60 dera Lei d’Aran establís qu’eth Conselh Generau d’Aran a es competéncies relatives a solèr e abitatge, especiaument era promocion e era gestion der abitatge public, tant eth destinat ara venda coma ath regim de loguèr. Atau madeish mèrque qu’eth Conselh pòt crear ua entitat esturmentau de caractèr institucionau que, se cau, pòt auer era condicion d’Administracion actuanta.

Eth conselhèr Marqués destacaue que: “er estudi qu’auem encomanat entà elaborar eth nòste Plan d’Abitatge se realizarà damb era collaboracion des Ajuntaments dera Val d’Aran, e se desvoloparà ua diagnòsi que permete impulsar politiques d’abitatge que melhoren era actuau situacion”.

Ath delà d’aguest ahèr, s’a tractat tanben sus er estat dera carretèra C-28. En aguest sens, era sindica d’Aran afirmaue que: “es pressupòsti dera Generalitat de Catalunya entà enguan contemplen ua partida d’un milion d’euros entà desvolopar eth projècte de melhora d’aguesta via, per tant, èm plan satisfèts de veir qu’aguesta qüestion, qu’entà Aran ei essenciau, auance, atau e coma ac hè eth projècte dera N-230” e higie que: “mos auem emplaçat entà seguir abordant aguest ahèr de manèra conjunta, a trauès dera comission que s’amassarà un aute còp pendent eth mes de març, entà tractar aguest projècte qu’ei vitau entà melhorar era seguretat viau des usatgèrs dera C-28 e entà transicionar a un modèl de mobilitat mès sostenibla”.

Vielha, 28 de hereuèr de 2023