De quèrra a dreta: Israel Planas, tecnician dera equipa dera RFEDI de SBX, Lucas Eguibar, membre dera equipa de SBX dera RFEDI, Anna Díaz, conselhèra de Torisme e Desvolpament Econòmic d’Aran, Luis Carlos Medina, vicesindic d’Aran e conselhèr d’Espòrts d’Aran, Regino Hernández, membre dera equipa de SBX dera RFEDI e Laro Herrero, membre dera equipa de SBX dera RFEDI.    

Eth vicesindic d’Aran e conselhèr d’Espòrts, Luis Carlos Medina, a arrecebut amassa damb era conselhèra de Torisme e Desvolopament Economic d’Aran, Anna Díaz, ara equipa de Snowboard Cross (SBX) dera Reau Federacion Espanhòla d’Espòrts d’Iuèrn (RFEDI) que se tròben aguesta setmana en tot entrenar ena estacion aranesa de Baqueira Beret.

Es membres dera equipa de SBX RFEDI son:

– Laro Herrero: (Fed. Cantabra) Eth cantabre deth club Tajahierro que comencèc era sua trajectòria ena Copa deth Mon eth 2009, dejà a disputat 18 pròves d’aguest circuit. A participat en 3 Campionats deth Mon: La Molina’11, Stoneham’13 e obtenguec eth 7au lòc en Kreischberg’15. Eth rider tanben acumule uns Jòcs Olimpics de Sochi’14 en sòn istoriau.

– Regino Hernández: (Fed. Andalosa) deth club EOE de Sierra Nevada siguec Campion deth Mon Júnior de Snowboard Cross eth 2011 e eth 2014 hec ua grana fin de sason en arténher era 3au plaça ena pròva de Copa deth Mon de SBX de La Molina. Ja pòrte 30 Copes deth Mon e anèc 5au en Veysonnaz era passada sason. A participat en 4 Mondiaus: Gangwon’09, Era Molina’11, Stoneham’13 e Kreischberg’15, a on obtenguec era 9au plaça, e a disputat 2 JJOO: Vancouver’10 e Sochi’14.

– Lucas Eguibar: (Fed. Basca) Eth donostiarra deth club Promosport guanhèc eth “Globo de Cristal” dera Copa deth Mon, era passada sason, ena disciplina de Snowboard Cross dempús d’arténher un aur e un argent enes Copes deth Mon de Veysonnaz’15 e ua 9au plaça en La Molina, a on se proclamèc guanhador deth circuit. Ath delà enes JJOO de Sochi’14 artenhec eth diplòma olimpic en classificar-se ena 7au plaça.

Lucas debutèc ena Copa deth Mon era sason 2011-12 e pòrte 17 pròves en aguesta categoria damb 4 podiums (Arosa’13 – 3au e Vallnord-Arcalís’14 – 2au, ath delà des dus podiums de Veysonnaz’15). Eth 2013 artenhec coronar-se campion deth Mon Júnior.

Les a acompanhat un des sòns tecnicians: Israel Planas

Eth vicesindic d’Aran e conselhèr d’Espòrts, Luis Carlos Medina, a manifestat “era Val d’Aran s’està plaçant enes darrèri ans coma ua destinacion toristica/esportiua de prumèr nivèu en tot acuélher a equipes de fotbòl, basquetbòl, esquí aupin, hons, ciclisme, running,… qu’escuelhen Aran entà hèr es sues preparacions. Enguan ath delà damb era installacion der Snow Park en Baqueira Beret auem pogut compdar damb era equipa nacionau de Snowboard Cross. Hè ues setmanes Baqueira tanben presentèc es rotes d’esquí de montanha, en tot acuélher ara equipa nacionau d’esquí de montanha”.

Anna Díaz, conselhèra de Torisme e Desvolopament Economic d’Aran, a soslinhat qu’“ei un aunor entara Val d’Aran compdar damb esportistes d’elèit dera talha dera equipa de SBX dera RFEDI e que poguen hèr en Baqueira Beret es sòns entrenaments demòstre que compdam damb ua des melhores estacions deth mon”.

Vielha, 13 de gèr de 2016

Conselh Generau d’Aran: Núria Sanjuan