• Era Comission Bilaterau Govèrn dera Generalitat-Conselh Generau d’Aran a aprovat aué eth traspàs de competéncies e servicis en matèria d’enfança e adolescéncia, en matèria de joenessa e era ampliacion dera dotacion economica entara Atencion Primària qu’encara demoraue per formalizar de hè ans.

• Era dotacion economica destinada ad aguestes competéncies de salut e benèster s’incremente en 499.804,32 euros qu’entraran laguens der acord de traspassi en tot deishar de gestionar-se coma era rèsta de territòris de Catalunya, tot e qu’en Aran i auesse era competéncia.

• Eth govèrn d’Aran a tornat a reclamar qu’entà barrar definitivaments aguest traspàs ei de besonh transferir es competències en matèria de declaracions de dependència, discapacitat e familhes nombroses, atau e coma era Lei d’Aran prevé, entà guanhar efectivitat e rapidesa tara ciutadania en aguesti tramits.

 Eth govèrn d’Aran a trabalhat e negociat damb era Generalitat pendent es darrèri dus ans entà arténher eth traspàs efectiu en matèria d’atencion sociau que, tot e èster reconeishuda pera Lei d’Aran coma ua competència deth Conselh Generau d’Aran, ena practica se gestionue enquia ara coma quinsevolh aute territòri de Catalunya.  Atau donc aguest maitin s’a formalizat aguest traspàs efectiu des competéncies e servicis en matèria d’enfança e adolescéncia atau com era de joenessa pendent era Comission Bilaterau Generalitat-Conselh celebrada telematicaments.

Aguest traspàs efectiu supòse deishar de gestionar er airau sociau a trauès deth contracte programa deth departament d’Ahèrs Sociaus dera Generalitat e hè’c dejà de forma autònoma.  En listrat de competències se higen as dejà adquirides es deth servici d’Intervencion socioeducativa  non residenciau entara enfança e adolescéncia en situacion de risc e es sues familhes, joenessa, servicis sociaus basics, d’orientacion e acompanhament as familhes  e servici d’atencion en entorn domiciliari en apartat d’Atencion Primària.  Er impòrt totau des dotacions economiques aprovades aué artenh lèu es cinc cents mil euros.

Era sindica d’Aran, Maria Vergés, a manifestat era satisfaccion deth govèrn d’Aran d’auer artenhut ara fin aguest traspàs que: “Repare ua situacion anòmala pr’amor que, tot e auer reconeishuda era competéncia en atencion sociau, eth Conselh Generau d’Aran auie de gestionar aguest airau dera madeisha forma qu’era rèsta de territòris, sense massa capacitat de decision e gestion”.

Vielha, 17 de junhsèga 2024