Vielha, 10 de hereuèr de 2017.- Telefónica a acordat eth desplegament dera fibra optica en ua prumèra fasa en nuclèu de Vielha, pendent es prumèrs mesi de 2017 e hèr-la extensibla en tota era Val d’Aran progressivaments, pendent eth 2017- 2018

Eth Govèrn d’Aran mantenguec pendent es darrèri mesi diuèrses reünions damb responsables dera companhia Telefónica en Catalonha, entà tractar sus er estat des installacions e eth desplegament d’aguest servici ena Val d’Aran.

Dempús de diuèrsi episòdis de talhs contunhats enes linhes de connexion de votz e donades a trauès des linhes operatives que ja existien, Telefónica informéc as membres deth Govèrn d’Aran que s’auie procedit ara installacion d’auta gessuda de transmission de donades e de telefonia mobila entara Val d’Aran, en connexion damb eth Palhars, entà evitar es incidents qu’a sofrit era Val d’Aran enes darrèri ans.

Auta des demandes deth Govèrn d’Aran, a estat qu’era companhia Telefónica garantisque eth bon foncionament deth servici as municipis deth Baish Aran entà evitar es talhs de servici qu’an afectat en aguesta zòna, enes darrèri ans, tant en telefonia fixa, mobila e de donades. Per aguest motiu, Telefónica procedís a realizar melhores en aguesta part dera val, que garantisquen damb fòrça mès seguretat era contunhitat deth servici.

D’auta banda, era companhia Telefónica, a desplegat era cobertura mobila 4G en totes es poblacions dera Val d’Aran.

Eth Govèrn d’Aran, a volut destacar era importància en defensa des interèssi des enterpreses e establiments dera Val d’Aran, signifique eth hèt de poder establir acòrds satisfasenti damb es enterpreses subministradores de servicis coma ei eth cas de Telefónica.

Carlos Barrera, soslinhèc qu’eth prèzthèt de seguiment que s’a hèt des deth Govèrn d’Aran e era bona receptivitat per part de Telefónica, permeterà qu’eth servici de fibra optica se desplegue gradauament en tota era Val d’Aran damb ua velocitat de 300 MB a prètz normau, çò que favorirà era competitivitat des enterpreses araneses e era melhora des comunicacions dera rèsta dera poblacion.