• Autant eth sindic d’Aran, Carlos Barrera, coma eth vicesindic d’Aran e conselhèr d’Espòrts, Luis Carlos Medina, an manifestat era sua implicacion ena Candidatura tostemp e quan s’agen en compde es installacions d’espòrts d’iuèrn araneses (estacion d’esquí de Baqueira Beret e eth Palai de Gèu de Vielha) e que formen part d’aguest projècte en sòn mès ampli aspècte: melhores enes installacions esportiues e enes infraestructures de comunicacion viaus.

Eth sindic d’Aran, Carlos Barrera, e eth vicesindic d’Aran e conselhèr d’Espòrts, Luis Carlos Medina, an assistit ara reünion dera Taula de trabalh tara candidatura olimpica Barcelona- Pirenèus convocada en Palai dera Generalitat de Catalonha pera consellera dera Presidéncia, Neus Munté.

En aguesta reünion s’an dat compde des conclusions dera Comission d’Estudi creada tad aguest efècte per part der Ajuntament de Barcelona.

Tanben s’a acordat era creacion d’ua taula de trabalh tara candidatura e d’un estudi d’oportunitats entath Pirenèu.

Era diferéncia substanciau actuau des requeriments deth COI (Comitat Olimpic Internacionau) damb es qu’en sòn moment demanaue entà acuélher uns jòcs olimpics e que motivèren era exclusion dera Val d’Aran, deth Pallars e dera Alta Ribagorça per motius de distància en aguesti moments e damb es naues exigéncies an cambiat e incorpòren as estacions d’esquí d’aguesti territòris.

Damb aguesta naua premisa, eth sindic d’Aran, Carlos Barrera, a manifestat eth sòn supòrt ath nau projècte e a demanat era incorporacion ena taula de trabalh e der estudi a representants deth Conselh Generau d’Aran.

Eth pròplèu deluns, dia 15 de mai, s’an convocat as alcaldes de Naut Aran e de Vielha e Mijaran a ua reünion en Conselh Generau d’Aran tà expausar-les es conclusions dera amassada d’aué. Per motius d’agenda, er alcalde de Vielha e Mijaran non poderà assistir, mès eith sindic d’Aran a previst amassar-se damb eth tan lèu era agenda der alcalde l’ac permeta.

Barrera a hijut: “A mesura que s’auance enes amassades de trabalh e d’estudi, se convocaràn tanben a toti es alcaldes e as presidents des EMD’s dera Val d’Aran, entà qu’en tot moment poguen hèr es sues aportacions en aguest temps de trabalh preparatòri dera Candidatura.”

Autant eth sindic d’Aran, Carlos Barrera, coma eth vicesindic d’Aran e conselhèr d’Espòrts, Luis Carlos Medina, an manifestat era sua implicacion ena Candidatura tostemp e quan agen en compde es installacions d’espòrts d’iuèrn araneses (estacion d’esquí de Baqueira Beret e eth Palai de Gèu de Vielha) e que formen part d’aguest projècte en sòn mès ampli aspècte: melhores enes installacions esportiues e enes infraestructures de comunicacion viaus.

Vielha, 12 de mai de 2017

Conselh Generau d’Aran: Núria Sanjuan

Fotos: Generalitat de Catalunya