• Era sindica d’Aran a hèt arribar ua carta ara Ministra de Viuenda entà explicar-li era situacion actuau ath temps que li sollicite qu’era normativa estatau contemple es zònes toristiques laguens des critèris entà declarar un territòri coma tensionat en matèria d’abitatge

• Eth govèrn d’Aran demanèc ja er an passat ara Generalitat de Catalunya era creacion d’ua Comission Mixta entà abordar era problematica ath temps que li solicitèc eth traspàs competenciau que n’aguest àmbit prevé era Lei d’Aran entà compdar damb es esturments e recorsi de besonh

• Era maxima institucion aranesa contunhe trabalhant en Plan de Viuenda dera Val d’Aran, ara demora de respòsta des autes administracions entà poder aplicar mesures urgentes que permeten destensionar era situacion actuau e garantir eth dret a ua viuenda digna des aranesi e araneses

Eth govèrn d’Aran contunhe trabalhant entà cercar solucions ara grèu situacion de manca de viuenda assequibla que patís eth país e qu’a de besonh era actuacion conjunta de totes es administracions competentes.

“Entath govèrn d’Aran aguesta ei ua qüestion primordiau, pr’amor qu’afècte de manèra dirècta ena vida des aranesi e araneses e en desvolopament deth nòste territòri”, afirmaue era sindica d’Aran, Maria Vergés, en tot híger que: “ath delà deth Plan de Viuenda dera Val d’Aran, en que portam un an trabalhant e damb eth que demoram poder  impulsar accions en aguest encastre tà facilitar er accès ar abitatge, tanben auem sollicitat autant ara Generalitat de Catalunya coma ath Govèrn der Estat que prenguen mesures entà revertir era situacion actuau”.

Ua des prumères donades obtengudes der estudi realizat entà desvolopar eth Plan de Viuenda dera Val d’Aran, ei que sonque un 38% der abitatge existent en nòste territòri se destine a viuenda oficiau. Atau madeish, cossent damb es donades der Incasòl deth passat mes de deseme, eth prètz deth loguèr en Aran s’a doblat en sonque un an, en tot plaçar-se enes 788,64€ de mieja.

Era sindica d’Aran, en ua missiva adreçada ara ministra de Viuenda e Agenda Urbana, a sollicitat ar Estat que revise eth marc de reconeishement dera tipologia de “municipis tensionadi” entà que demoren includidi aqueri que, peth sòn caractèr toristic, an limitat er accès ara viuenda entàs collectius vulnerables, coma ei eth cas dera Val d’Aran; e a sollicitat ua trobada damb era entà poder tractar aguest ahèr.

Eth govèrn d’Aran dejà aprovèc en sòn Plen deth passat 19 de gèr ua Declaracion Institucionau entà qu’er Estat modifique es critèris tà catalogar es airaus tensionadi en matèria d’abitatge, que se hec a arribar tanben ara Generalitat de Catalunya e es Ajuntaments aranesi.

Atau madeish, era maxima institucion aranesa a sollicitat tanben en diuèrses ocasions ara Generalitat de Catalunya eth traspàs der encastre competenciau qu’en matèria d’abitatge li reconeish era Lei de Regim Especiau.

“Deth govèrn d’Aran ençà volem, d’un costat, ampliar er àmbit competenciau qu’era Lei mos permet entà èster proactius e trapar solucions a cuert termini que mos permeten anar destensionant era situacion actuau e, per un aute costat, tanben volem arténher eth compromís dera Generalitat, qu’ei qui a era competéncia exclusiva en matèria d’abitatge, entà, entre d’autes qüestions, trabalhar conjuntament ena regulacion des abitatges d’emplec toristic, qu’ei un des elements que mos sature eth parc de viuenda disponibla”, manifestaue tanben era sindica d’Aran.