• Eth Conselh Generau d’Aran trabalhe diuèrsi ahèrs primordiaus entath territòri damb era Deputacion de Lleida e eth govèrn der Estat, coma era melhora dera N-230, era adequacion dera antiga bastissa d’òbres publiques entà que pogue acuélher un espaci de coworking e de dinamizacion dera activitat economica e empresariau, es melhores en hilat de vies d’accès as nuclèus aranesi, er abordament dera problematica dera viuenda o eth reconeishement dera singularitat d’Aran per part der Estat, entre fòrça d’auti

Eth govèrn deth Conselh Generau d’Aran trabalhe en collaboracion damb d’autes administracions entà impulsar diuèrses politiques e actuacions que permeten un desvolopament territoriau dera Val d’Aran. Per aguest motiu, s’a creat ua Comission Institucionau ena que prenen part era sindica d’Aran, Maria Vergés, eth vicepresident tresau dera Deputacion de Lleida, Juan Antonio Serrano, eth secretari generau entath Rèpte Demografic, Paco Boya, e eth deputat deth Congrès, Amador Marqués.

“I a ahèrs e projèctes primordiaus entath territòri qu’auem dejà iniciat e tàs qu’ei de besonh coordinar-mos damb es administracions corresponentes entà que poguen esdevier ua realitat en Aran en menor temps possible”, asseguraue era sindica d’Aran.

En aguest sens, se trabalhe damb era Deputacion de Lleida en projècte d’adequacion deth centre logistic de biomassa plaçat en Les, entà poder convertir en estèra era biomassa extrèta des nòsti bòsqui, tanben se trabalhe ena melhora dera codina der Espitau Val d’Aran qu’a de besonh ua actuacion urgenta, en un projècte transversau entà actuar en Palai de Gèu de Vielha, e ena coordinacion enes melhores enes vies d’accès as pòbles d’Aran, entre d’auti.

Damb eth Ministèri entara Transicion Energetica e eth Rèpte Demografic (Miteco) son diuèrses es accions conjuntes enes que se trabalhe, coma ei er impuls dera bioeconomia e era transicion energetica, ahèr entath quau era Fundación Biodiversidad, deth Miteco, a destinat dues ajudes per valor de 3,1M€ hè quauqui dies, eth Plan de Sostenibilitat Toristica dera Val d’Aran e diuèrses actuacions qu’an a veir damb era innovacion, coma era melhora dera antiga bastissa d’òbres publiques plaçada en centre de Vielha qu’er Estat a cedit ath Conselh, dempús de fòrça ans de desús, entà arténher un equipament que pogue acuélher un espaci de coworking e de dinamizacion dera activitat economica e empresariau, vinculat damb eth HUB d’innovacion HèPic.

Atau madeish, i a d’autes qüestions primordiaus a tractar damb eth govèrn der Estat coma ei eth desvolopament dera Agenda N-230, era problematica der accès a ua viuenda accessible, era creacion d’un Centre d’Espòrts de Naut Rendiment o eth reconeishement dera singularitat aranesa per part der Estat Espanhòl.