• Ena amassada mantenguda aué en Conselh Generau d’Aran entre eth govèrn aranés, representants deth Grèmi d’Ostalaria e Baqueira Beret e responsables deth sistèma sanitari aranés, s’a tractat sus es circuits e protocòls a seguir pendent era tempsada d’esquí deuant deth COVID-19, ena madeisha linha que ja s’a hèt damb es escòles e instituts d’Aran

Aguest maitin era conselhèra d’Igualtat, Salut e Benèster, Maria Vergés, acompanhada des conselhèrs d’Economia, Torisme e Promocion Economica, Juan Antonio Serrano e Josep Canut, e des responsables deth Servici Aranés de Salut e Benèster, s’an amassat damb representants deth Grèmi d’Ostalaria Val d’Aran e dera estacion d’esquí Baqueira Beret entà abordar eth protocòl a seguir deuant deth COVID-19 pendent era tempsada d’iuèrn.

En aguesta amassada, s’a acordat era creacion d’ua taula de trabalh entre eth govèrn d’Aran, es responsables sanitaris, eth Grèmi d’Ostalaria e Baqueira Beret, entà, en prumèr lòc definir es circuïts a seguir en cas de detectar-se casi positius en aguesti sectors, e tanben entà supervisar e méter en comun es plans de contingéncia qu’aguestes empreses premanissen entà encarar er iuèrn, atau coma tà hèr-ne eth seguiment pendent era sason d’iuèrn.

Segontes a declarat era conselhèra d’Igualtat, Salut e Benèster, Maria Vergés, “er objectiu d’aguesta taula de trabalh ei, atau e coma auem hèt damb eth sector educatiu, sajar d’auançar-mos e actuar damb era major celeritat e eficàcia possibla deuant d’un cas positiu en COVID-19, tant enes persones que mos visiten, coma enes trabalhadors des empreses deth sector toristic” e a hijut que “era estabilitat deth sistèma socioeconomic dera Val d’Aran, e des familhes que depenen deth torisme, a de besonh en bona mesura de qu’era tempsada d’iuèrn foncione, e pr’amor d’açò auem de sajar entre toti d’establir ua estratègia comuna que mos ajude a afrontar-la damb cèrtes garanties”.

Pendent era amassada, s’a tornat a reiterar eth besonh de que, atau e coma s’a reclamat ara Generalitat, es pròves PCR se poguen realizar en Espitau Val d’Aran, çò qu’implicarà ua major rapidesa ena respòsta e en esvitar danhs majors.