Un centenat de persones se concentren ena boca nòrd deth tunèl de Vielha atengut era situacion d’ERO d’extincion de contractes e eth barrament previsible d’aguestes tres empreses emblematiques de Les e era importància qu’an entara Val d’Aran

Es empreses de Les: Neoelectra Aran e Carboneco parèren era sua activitat eth passat mes de març de 2014 e Caviar Nacarii contunhe damb era sua produccion de caviar, mès tanben ei immergida, coma es dus anteriors, en un concors de creditors e acabarà barrant se non se produsís un cambi de darrèra ora. Aguesta situacion ei provocada dirèctaments peth cambi de nòrma des Energies Renovables deth passat en hereuèr de 2014, impulsat per actuau govèrn der Estat.

Atengut era situacion d’ERO d’extincion de contractes e eth barrament previsible d’aguestes tres empreses emblematiques de Les e era importància qu’an entara Val d’Aran, es trabalhadors/es e eth sindicat dera UGT-Terres de Lleida an amassat aué, 10 d’octobre, a un centenat de persones en ua concentracion ena boca nòrd deth Tunèl de Vielha.

Ara concentracion an assistit eth sindic d’Aran, Carlos Barrera, eth vicesindic d’Aran, Luís Carlos Medina, era conselhèra de Torisme, Comèrç e Consum d’Aran, Anna Díaz, eth conselhèr d’Empresa e Trabalh d’Aran, Eduardo Valdecantos, ath delà de trabalhadors/es des plantes de Les, atau coma representants des plantilhes d’Aliaga (Teròl), Òsca e deth centre logistic de Barcelona, trabalhadors de Navarra e vesins dera Val d’Aran.

Carlos Barrera, sindic d’Aran, a manifestat “èm conscients qu’aguest barrament ei conseqüéncia d’ua decision deth Govèrn Centrau e dera coneishuda Ley Soria, dificilment se pòden prevéir solucions concrètes”.

En paraules deth vicesindic d’Aran, Luís Carlos Medina, “eth Govèrn d’Aran, a trauès des sòns representants, sostien as empreses e as trabalhadors en aguest procès contra eth barrament dera Centrau de Les”.