• Eth Plen dera maxima institucion aranesa a aprovat aué per unanimitat era declaracion e catalogacion definitiva coma Bens Culturaus d’Interès Locau  (BCIL) des capèles de Sant Blas e era Mair de Diu dera Pietat de Les, des glèises de Santa Maria de Cap d’Aran de Tredòs, Sant Andreu de Salardú, Santa Eulària d’Unha e Sant Joan de Les, e es bens mòbles associadi ar Ecomusèu Çò de Joanchiquet de Vilamòs

• En aguest Plen s’a amiat a tèrme tanben era prenuda de possession deth senhor José Luis Boya coma conselhèr deth govèrn deth Conselh Generau d’Aran e qu’assomirà era cartèra d’Infraestructures e Servicis

Eth Conselh Generau d’Aran a celebrat aguest maitin eth sòn Plen en session ordinària, a on s’a aprovat per unanimitat era declaracion e catalogacion definitiva coma Bens Culturaus d’Interès Locau  (BCIL) des capèles de Sant Blas e era Mair de Diu dera Pietat de Les, des glèises de Santa Maria de Cap d’Aran de Tredòs, Sant Andreu de Salardú, Santa Eulària d’Unha e Sant Joan de Les, e es bens mòbles associadi ar Ecomusèu Çò de Joanchiquet de Vilamòs.

Cau rebrembar que, en gèr de 2022, eth govèrn d’Aran auec de declarar era caducitat des expedients d’incoacion de Bens Culturaus d’Interès Nacionau (BCIN) de 50 elements patrimoniaus deth nòste terriòri dempús qu’er Ajuntament de Naut Aran, en deseme de 2020, denoncièsse er expedient administratiu de declaracion coma BCIN d’aguesti monuments.

“Deth govèrn d’Aran ençà èm comprometudi damb era proteccion e promocion deth nòste patrimòni e ei era nòsta volontat evitar que se maumete damb eth temps, conscients deth valor culturau e identitari qu’an es nòsti monuments e conjunts istorics” afirmaue era sindica d’Aran, Maria Vergés, en tot híger que: “damb era declaracion definitiva coma BCIL d’aguesti set elements patrimoniaus artenhem qu’es administracions agen era obligacion d’invertir recorsi entara sua preservacion, en tot garantir atau eth suenh ath nòste auviatge e era nòsta cultura, que son un des grans tresaurs dera Val d’Aran”.

En aguest Plen s’a amiat a tèrme tanben era prenuda de possession deth senhor José Luis Boya coma conselhèr d’Infraestructures e Servicis deth Conselh Generau d’Aran, dempús qu’en darrèr Plen, celebrat eth passat mes de hereuèr, se presentèsse era renóncia ath cargue de conselhèr per part deth senhor Amador Marqués.

Entre d’auti ahèrs tanben s’an aprobat era mocion deth grop d’Unitat d’Aran en Conselh Generau d’Aran entà dar supòrt as reivindicacions deth sector dera pagesia e ramadèr, e era mocion presentada peth grop de Convergéncia Aranesa tanben en supòrt ad aguest sector.