• Era sindica d’Aran s’a adreçat ara conselhèra de Justícia, Drets e Memòria, dempús de conéisher qu’era Generalitat avalòre era possibilitat de redusir era plantilha dera oficina judiciau de Vielha, entà sollicitar que se mantengue era actuau estructura e evitar eth risc de collapse administratiu e judiciau, en tot garantir ara ciutadania aranesa eth dret ara justícia e er accès ad aguest servici

Era sindica d’Aran, Maria Vergés, a adreçat ua carta ara conselhèra de Justícia, Drets e Memòria, Gemma Ubasart, dempús qu’eth collectiu d’advocats e procuradors deth partit judiciau de Vielha e Mijaran li age trasladat qu’eth departament de Justícia dera Generalitat avalòre era possibilitat de suprimir un foncionari en airau de tramitacion d’expedients dera oficina judiciau.

Era sindica a mostrat era sua preocupacion deuant d’aguest ahèr e a exposat que: “pendent es darrèri ans, aguest jutjat ven de trauessar ua situacion fòrça complèxa e delicada qu’a provocat situacions de collapse administratiu que damb era actuau plantilha que ven de reforçar-se enes darrèri tempsi comence a melhorar de forma eficaça en çò que hè ara tramitacion agila des expedients judiciaus”.

Era preséncia d’un jutjat de prumèra instància ena Val d’Aran que balhe atencion a tot eth nòste terriròri, apunte era sindica ena sua missiva, ei essenciau entà garantir ara ciutadania aranesa eth dret ara justícia e er accès ad aguest servici, per tant, deuant deth risc de colapse d’aguest jutjat, a sollicitat “que pogatz mantier era actuau estructura deth jutjat de Vielha entara bona gestion dera tramitacion des expedients”.