Vielha, 24 de mai de 2018.- Eth Govèrn d’Aran e es centres educatius d’Aran an renauit eth convèni de promocion deth Plan Catalan “Espòrt ena Escòla” de foment des practiques esportiues enes escòles, que s’a agranit a toti es centres educatius dera Val d’Aran.

Eth Conselh Generau d’Aran apòrte 7.500 € destinadi as Associacions Esportiues der IES d’Aran, ZER Val d’Aran, Escòla Sant Ròc e Escòla Mairau er Audéth, CEIP Garona e Escòla Alejandro Casona, qu’arreceben 1.500 € cadun entà er an 2018.

D’aguesta manèra eth Conselh Generau d’Aran ajude a finançar es activitats que favorissen era preséncia der espòrt ena formacion des mainatges e mainades d’entre 4 e 18 ans.

Es objectius deth Plan Catalan “Espòrt ena Escòla” son entre d’auti incrementar era participacion en activitats fisiques e esportiues en orari non lectiu der alumnat des centres educatius de primària e de segondària, profitar eth gran potenciau educatiu e formatiu des activitats fisiques e esportiues, en tot cercar era participacion peth dessús dera competitivitat e potenciar era foncion integradora e de coesion sociau der espòrt escolar, en tot facilitar er accès de toti es mainatges e mainades ara practica esportiua escolara.