• Eth govèrn deth Conselh Generau d’Aran a ecomanat un estudi, d’acòrd damb era Generalitat de Catalunya, entà elaborar eth Plan d’Abitatge d’Aran qu’a de perméter impulsar accions en aguest encastre tà facilitar er accès ar abitatge

• Eth govèrn d’Aran trabalhe entà cercar solucions ara actuau problematica de viuenda, entre eres qu’eth Conselh Generau pogue arténher mès competéncies dotades economicaments en aguest àmbit, pr’amor qu’actuaument era competéncia exclusiva en matèria d’abitatge correspon ara Generalitat

Eth govèrn deth Conselh Generau d’Aran a encomanat un estudi entà elaborar un Plan d’Abitatge adaptat as critèris deth Plan Sectoriau der Abitatge dera Generalitat de Catalunya, damb er objectiu de cercar solucions as problematiques que presente eth nòste territòri en aguest encastre.

“Era der abitatge ei ua qüestion que reclame de solucions urgentes deuant dera grèu situacion de manca de viuenda assequibla ena Val d’Aran” asseguraue era sindica d’Aran, Maria Vergés, en tot híger que: “resulte indispensable qu’eth Conselh Generau d’Aran pogue arténher mès competéncies, dotades coma cau, en aguest àmbit que li permeten anar mès enlà de çò que pòt hèr ara, sense desbrembar que, atau e coma mèrque er article 137 der Estatut d’Autonomia de Catalunya, era competéncia exclusiva en matèria d’abitatge correspon ara Generalitat”.

Eth conselhèr de Governacion d’Aran, Amador Marqués, destacaue que: “a trauès d’aguest estudi, que se realizarà damb era collaboracion des Ajuntaments aranesi, se desvoloparà ua diagnòsi que permete impulsar politiques d’abitatge que melhoren era actuau situacion”.

S’amiarà a tèrme un triple trabalh: ua analisi dera situacion, identificant de manèra qualitativa e quantitativa es principaus problematiques e potencialitats; ua diagnòsi compartida dera situacion actuau en territòri e en cada municipi, autant en relacion damb es problematiques coma en relacion as actuacions que s’amien a tèrme actuaument, e ua definicion des politiques d’abitatge que se pòden desvolopar deth Conselh Generau d’Aran ençà.