Vielha, 14 de junh de 2018.- Eth Conselh Generau d’Aran, a trauès dera enterpresa Servicis Ambientaus dera Val d’Aran (SAVA S.L.) desvolòpe un plan de neteja de camins forestaus pes afectacions produsides ath long deth passat iuèrn ena montanha.

Aguesta intervencion afècte a camins de tota era Val d’Aran (connexions e accèssi entre pòbles e rotes toristiques) er espaci dera accion son camins vesiaus, pistes forestaus e neteja dera vegetacion enes airaus recreatius.

Se trabalhe enes camins damb retroexcavadores entara canalizacion der aigua e era extraccion de materiau acumulat coma branques d’arbes e pèires. Es manòbres trabalharàn ena neteja e desbrossament manuau entà poder retirar petiti en·honsaments produsidi pera nhèu o eth desgèu.

Ad aguestes neteges cau ahíger es trabalhs jornalièrs pendent er ostiu en Varradòs, Artiga de Lin, Liat, Vilamòs e Canejan entà garantir er accès as espacis naturaus mès emblematics dera Val d’Aran.

Eth conselhèr d’Agricultura, Ramaderia e Miei Naturau d’Aran, José Enrique Arrò, a explicat qu’es condicions meteorologiques d’aguesta primauera en Aran, damb fòrça ploja e era rèsta encara de quantitats considerables de nhèu enes parts mès nautes des montanhes, a hèt qu’es trabalhs s’amien a tèrme mès lentaments de çò que se poirie demorar enes condicions abituaus entad aguesta epòca der an.