• Es Pompièrs d’Aran an amiat a tèrme aué en municipi de Bossòst era prumèra crema controlada deth Plan Estrategic de gestion sostenibla de regim de huec dera Val d’Aran.

• Aguest Plan Estrategic, impulsat peth govèrn deth Conselh Generau d’Aran, a coma objectiu modificar era vegetacion cada còp mès omogeneïzada que i a enes nòstes montanhes entà preveir eth risc de huec e balhar as pompièrs un esturment de fòrça utilitat entà actuar deuant des huecs.

• Aguesta iniciativa se hig ath projècte de gestion forestau qu’impulse eth Conselh Generau entà qu’andues accions servisquen tà aumentar era resiliéncia des nòsti bòsqui entà evitar eth risc de huecs de sisau generacion e gestionar es recorsi forestaus dera Val d’Aran a trauès d’ua silvicultura activa e respectuosa damb era biodiversitat e encaminada ara transicion energetica.

Aguest maitin, a compdar des 09:00 ores, es Pompièrs d’Aran an amiat a tèrme ua crèma controlada en municipi de Bossòst, en parçan d’Estiuèra. Aguesta ei era prumèra crema controlada que s’amie a tèrme laguens des accions contemplades peth Plan Estrategic de gestion sostenibla de regim de huec dera Val d’Aran, impulsat peth govèrn deth Conselh Generau d’Aran.

“Aguest ei un Plan pionèr que preten amiar a tèrme accions a trauès de cremes controlades entà modificar era vegetacion que i a en aguesti moments enes nòstes montanhes, qu’ei cada còp mès omogeneïzada, entà evitar eth risc d’incendis de siesaua generacion” a explicat era sindica d’Aran, Maria Vergés, en tot híger que: “ei un Plan que ven dera man deth nòste projècte de gestion forestau, que pretén extrèir biomassa des nòsti bòsqui entà trabalhar ena transicion energetica per un costat e disminuir era carga de materiau que i a enes bòsqui dera Val d’Aran dempús de decades de manca de gestion e, que n’aguesti moments, coma apunten es expèrts, supause un risc reau de qu’es nòsti bòsqui cremen”.

Aguest meddia, era sindica d’Aran s’a amassat damb eth Major de Pompièrs, Manel Bosch, e er inspector deth còs de Bombers de la Generalitat e referent internacionau ena matèria, Marc Castellnou, damb qui an parlat sus era grana importància qu’a entara Val d’Aran era aplicacion d’aguest Plan.

“Aguestes cremes controlades permeten recuperar es espacis dubèrts qu’es ramadèrs mantenguien damb er emplec deth huec tèmps endarrèr. Quan se pèrden aguesti peisheus pes arbilhons, se pèrd tanben part dera biodiversitat. Atau donc, aguestes cremes controlades an ua dobla accion: permeten era gestion d’ecosistèmes e biodiversitat pendent er iuèrn entà garantir era seguretat e preveir eth risc d’incendis en ostiu” manifestaue Castellnou.

Eth Plan Estrategic de gestion sostenibla de regim de huec dera Val d’Aran prepause ua metodologia pionèra entà crear un marc de trabalh transversau e de consens en territòri en relacion ar emplec deth huec, afavorís era resiliéncia des nòstes montanhes e autreje ath nòste còs de Pompièrs un esturment de fòrça utilitat entà actuar deuant un incendi enes sectors especificadi en aguest document.