• Eth Conselh Generau d’Aran e er Ajuntament d’Es Bòrdes cerquen damb aguest projècte, que supausarà era creacion d’un espaci interpretatiu plaçat laguens deth perimètre dera tor mèstra dera fortalesa, promocionar e dar a conéisher era istòria deth nòste territòri e eth nòste auviatge culturau en un endret tant important coma Castèth Leon, que siguec era principau fortalesa dera Val d’Aran e sedença deth poder reiau des deth sòn bastiment en 1283 enquiara sua des·hèta en 1719

Ena tarde d’ager auec lòc era presentacion deth projècte d’adequacion d’un espaci interpretatiu des roïnes arqueologiques de Castèth Leon, en Es Bòrdes, amiat a tèrme per arquitècte Guilhèm Vilches entà méter en valor e revalorizar aguest endret tan important dera cultura e istòria araneses. Un projècte qu’amie a tèrme eth govèrn d’Aran, a trauès deth sòn Plan de Sostenibilitat Toristica, damb era collaboracion der Ajuntament deth municipi.

Eth passat mes de seteme, eth govèrn d’Aran creèc un video 3D divulgatiu que recreaue coma ère eth Castèth Leon en base a documentacion grafica, plans e descripcions escrites, resultat des cataments arqueologics e ua comparativa damb d’autes fortificacions dera madeisha epòca.

Ara, se vò crear un espaci que permete era visualizacion d’aguest video divulgatiu e er accés ath guardadèr superior entà visualizar es roïnes e identificar es disparières parts dera fortalesa, un espaci qu’anarà plaçat laguens deth perimètre dera tor mèstra.

“Deth govèrn Conselh Generau d’Aran ençà consideram eth suenh e promocion deth nòste auviatge culturau un des nòsti pilars fonamentaus, per aguest motiu, era metuda en valor deth Castèth Leon ère e ei un ahèr primordiau, pr’amor qu’es sues rèstes son eth testimòni de fòrça segles dera nòsta istòria, que consideram de besonh dar a conéisher”, afirmaue era sindica d’Aran, Maria Vergés, en tot híger que: “ath delà, damb accions coma aguesta volem tanben diversificar es punts d’interès deth nòste territòri coma destinacion toristica e promocionar es atractius des nòsti pòbles, èishi primordiaus que desvolopam a trauès deth nòste Plan de Sostenibilitat Toristica”.

Castèth Leon siguec era principau fortalesa dera Val d’Aran, sedença deth poder reiau des deth sòn bastiment en 1283 enquiara sua des·hèta en 1719. Aguesta  importància istorica a generat ua plan abondosa documentacion, ath temps qu’a convertit eth parçan en un lòc plan emblematic entara Val d’Aran.

De 2005 enquia 2015 s’amièren a tèrme campanhes arqueologiques que permeteren recuperar es rèstes deth castèth, totun, se trapauen plan enroeïnades, çò que dificulte era sua interpretacion per part des visitants. Entà balhar responsa ad aguesta problematica e, ath madeish temps, contribusir ara sua conservacion, en 2011 se procedic a amiar a tèrme ua campanha d’assolidament e recreishement des sòns murs, en especiau, dera tor mèstra dera quau sonque ne demoraue eth traçat sus era ròca mair. D’alavetz ençà, un drapèu d’Aran ondèje sus aguest punt iconic deth territòri.