• Eth programa “Botja-te damb cap”, dirigit per professionaus dera salut, amasse activitat fisica e debat generau e s’amiarà a tèrme cada dimèrcles a compdar de deman, 10 de gèr, en auditòri dera Residéncia Sant Antòni de Vielha pendent eth mes de gèr e ena antiga Escòla Mairau de Les en mes de hereuèr

Eth govèrn deth Conselh Generau d’Aran, a trauès des sòns Servicis Assistenciaus Integrats, amiarà a tèrme cada dimèrcles, de 12:00 a 13:30, “Botja-te damb cap” un programa d’activitat fisica e debat generau dirigit per professionaus dera salut e adreçat entà persones majors de 65 ans.

“Eth principau objectiu deth govèrn deth Conselh Generau d’Aran ei desvolopar accions e politiques que placen as persones en centre e ajuden a melhorar era sua qualitat de vida, e damb aguest objectiu nèish aguest programa”, asseguraue era sindica d’Aran, Maria Vergés, en tot híger que “respon ara volontat de velhar pera salut e autonomia des nòstes persones granes, en tot balhar-les un servici que pensam que les poderà servir entà realizar activitat fisica e terapeutica de forma regular e esdevier un espaci de trobada”.

Pendent eth mes de gèr aguestes sessions s’amiaràn a tèrme en Auditòri dera Residéncia Sant Antòni de Vielha e en hereuèr ena antiga Escòla Mairau de Les.

Es inscripcions se pòden realizar telefonant ath 973 64 31 41.