• Aguest espaci comunitari d’atencion especializada e aprenedissatge collectiu, compdèc ena sua prumèra edicion damb era participacion de 54 persones, e se tornarà a amiar a tèrme a trauès des professionaus especializadi des Servicis Assistenciaus Integrats d’Aran pendent es mesi d’abriu a junh

Eth govèrn d’Aran, a trauès des sòns Servicis Assistenciaus Integrats, a iniciat dejà era dusau edicion deth programa “En Familha”, er espaci comunitari d’atencion especializada e d’aprenedissatge collectiu, qu’ena sua prumèra edicion compdèc damb un gran èxit e i arribèren a participar 54 persones.

“Deth Conselh Generau d’Aran ençà èm plan satisfèts de poder amiar a tèrme aguesta dusau edicion, pr’amor que consideram qu’aguest espaci esdeven un recors gratuït de fòrça utilitat entàs famílies deth territòri”, asseguraue era sindica d’Aran, Maria Vergés, en tot híger que: “permet qu’es famílies dera Val d’Aran compartisquen es sòns dubtes damb es nòsti professionaus especializadi des Servicis Assistenciaus Integrats, que les balhen responses e informacion en airaus coma desvolopament infantil, tecniques de comunicacion, menopausa, estudis postobligatòris, alimentacion…”.

Aguesta naua edicion, ena quau s’an includit naues tematiques coma autonomia des persones granes, consultes entà persones deth collectiu LGTBIQ+ o jòcs coma esturment educatiu entàs familhes, se desvoloparà pendent es mesi d’abriu a junh toti es dimars e dimèrcles en carrèr Pomaròla 12, de Vielha. Er orari de consulta dubèrta serà de 16h a 19h e er orari des talhèrs de 17:30h a 19h. Se dispause de servici de suenh as infants pendent es consultes e talhèrs.