• Dempús des estudis pertinents, dejà s’a iniciat era fasa d’exploracion deth projècte d’impuls dera geotermia, damb era realizacion de dus tipes de sondatges entà amiar a tèrme ua monitorizacion a trauès dera installacion de sensors entà caracterizar eth potenciau geotermic, sensors de temperatura entà veir era evolucion deth terren e piezomètres entà estudiar era evolucion deth nivèu d’aigua

• Eth Conselh Generau d’Aran impulse era implementacion d’aguest tipe d’energies renauibles amassa damb er ICGC e er Ajuntament de Vielha e Mijaran damb es qu’a establit un acòrd de collaboracion

• Eth principau objectiu deth govèrn d’Aran ei auançar enquia un futur mès sostenible e eficient energeticament a trauès dera energia neta de Km 0 que mos balharien era geotermia, era biomassa e era energia solar

Eth Conselh Generau d’Aran a començat dejà damb era fasa d’exploracion deth sòn projècte d’impuls dera geotermia, ua fasa que consistís ena realizacion de dus tipes de sondatges: un d’intercambiadors geotermics e un aute d’exploracion damb recuperacion de testimòni.

“Per miei d’aguesti sondatges poiram conéisher quin ei eth tipe de ròca e de terren sus eth quau trabalham e, posteriorament, se realizarà ua monitorizacion a trauès dera installacion de sensors entà caracterizar eth potenciau geotermic, sensors de temperatura entà veir era evolucion deth terren e piezomètres entà estudiar era evolucion deth nivèu d’aigua”, explicaue eth conselhèr de Gestion Ambientau e Transicion Energetica, Oriol Sala.

Peth sòn costat, era sindica d’Aran, Maria Vergés, apuntaue que: “er impuls des energies renauibles ei vitau entath nòste territòri e eth govèrn deth Conselh Generau d’Aran dejà comencèc a trabalha-i ena passada legislatura e demoram poder anar-les implementant ath long d’aguesti quate ans” e higie que: “en tot èster conscients deth potenciau deth nòste territòri, es energies renauibles que plantejam son era geotermia, era biomassa e era energia solar, entà poder provedir Aran d’ua energia neta e de kilomètre 0 que mos permete auançar enquia un futur mès sostenible e eficient energeticament”.

En aguest sens, cau rebrembar qu’eth Conselh Generau d’Aran compde damb un convèni de collaboracion damb er Institut Cartografic e Geologic de Catalunya (ICGC) entar impuls dera geotermia ena Val d’Aran e un aute damb er Ajuntament de Vielha e Mijaran entara valoracion dera viabilitat tecnico-economica deth projècte der hilat de climatizacion urbana 100% renovable en Vielha e entara promocion des energies renovables en territòri.

“Er objectiu deth govèrn d’Aran damb aguesti dus convènis ei sajar de hèr un estudi prèvi e elaborar er avantprojècte d’un hilat de calor damb energies renovables que pogue servir entà provedir ath Palai de Gèu, eth Palai d’Espòrts, era Escòla Garona, er Institut d’Aran e ua bastissa privada, aumens ena fasa de projècte” explicaue eth conselhèr Sala, en tot arregraïr: “autant er ICGC coma ar Ajuntament de Vielha e Mijaran era sua collaboracion entà amiar a tèrme aguest projècte”.

Un còp finalizada era fasa d’exploracion, se passarie ath següent pas, consistent en un estudi d’alternatives en quau, a partir des besonhs identificadi enes bastisses, se pogue obtier quina quantitat de demanda se poirie cobrir damb cada tipologia d’energia renovable (geotermia, biomassa e energia solar), damb er objectiu principau d’arténher substituir es cauhatges actuaus damb combustibles fossils damb un hilat 100% renauible.

Ei important destacar tanben qu’era informacion obtenguda d’aguesti sondatges e que serà extrapolable entà lèu tot eth pòble de Vielha, serà publica e se poirà consultar de manèra gratuïta un còp finalizades es intervencions.