• Era sindica d’Aran, Maria Vergés, e er alcalde de Bossòst, Amador Marqués, s’an adreçat aguest viatge ath secretari d’Estat de Seguretat, Rafael Pérez Ruiz
Eth govèrn de França barrèc de manèra unilaterau eth pas termierèr deth Portilhon eth passat dia 6 de gèr entàs 20 ores per un periòde indeterminat. A despiet de qu’a dia d’aué se pòt trauessar era frontèra entre es dus païsi per Mèles-Pònt de Rei, eth Portilhon ei eth pas que garantís un fluxe diari e abituau entre francesi e aranesi.
Aguest barrament cause prejudicis a totes es persones que cada dia s’an de desplaçar tà França per motius laboraus, ja qu’ara an mieja ora mès de trajècte, mès de 60 km, e tanben hè mau tara nòsta economia e societat pr’amor des relacions comerciaus, sanitàries e familiaus damb es territòris vesins francesi.
Dauant d’aguesta situacion persistenta, aguesti darrèri dies era sindica d’Aran, Maria Vergés, amassa damb er alcalde de Bossòst, Amador Marqués, an tornat a enviar ua missiva a on solliciten era dubèrta d’aguesta frontèra, e aguest viatge l’ac an hèt a arribar, ath secretari d’Estat de Seguretat, Rafael Pérez Ruiz.
Eth passat 26 de junh, era sindica d’Aran e eth baile de Bossòst ja envièren ua carta tara Préfecture e Sous-préfecture dera Haute Garonne, e ua auta missiva eth 4 de junhsèga tath secretari d’Estat entara Union Europèa. Aguest reïterat enviament de cartes respon ara preocupacion e incomprension des dus representants dauant d’aguesta situacion pr’amor que diuèrsi punts consideradi segondaris dera frontèra francoespanhòla s’an daurit a excepcion deth Portilhon.
Eth govèrn d’Aran non desistirà ena demana de restituïr era circulacion en aguesta importanta via tara gent deth nòste territòri e agotarà totes es vies diplomatiques entà artenher-ne era dubertura.
Vielha, 11 d’agost de 2021