• Era sindica d’Aran s’amassèc ager en Barcelona damb era conselhèra de Territòri, Abitatge e Transicion Ecologica dera Generalitat a qui trasladèc eth besonh qu’era Generalitat de Catalunya reprene eth compromís de melhora dera carretèra C28 atau coma tanben era urgéncia en desvolopar solucions ara manca d’abitatge assequible en Aran.

Era sindica d’Aran, Maria Vergés, s’amassèc ager en Barcelona damb era conselhèra de Territòri, Abitatge e Transicion Ecologica dera Generalitat de Catalunya, Silvia Paneque, a on li manifestèc es besonhs deth territòri en matèria d’ordenacion territoriau e urbanisme, un traspàs qu’eth govèrn aranés considère de besonh atau e coma prevé era Lei 1/2015, deth regim especiau dera Val d’Aran.

Ua des prioritats exposades per part deth govèrn aranés en aguest apartat ei era garantia des inversions enes infrastructures que tanhen ara Generalitat, aguest ei eth cas dera C-28, a on se demane que s’agilize era milhora d’aguesta via atau e coma se comprometec ena passada legislatura, tot e non desvolopar-se cap projècte enquiath moment.

Un aute des ahèrs tractadi sigueren es competéncies en matèria d’urbanisme e en abitatge. En aguest sens, era sindica d’Aran transmetec ara conselhèra eth besonh dera constitucion dera Taula d’Abitatge entre Conselh Generau d’Aran e Generalitat que permete abordar amassa es solucions ara actuau problematica, atau coma trabalhar es diuèrsi traspassi competenciaus possibles en aguest àmbit.

Entara sindica d’Aran, Maria Vergés: “volem, d’un costat, ampliar eth domèni competenciau qu’era Lei mos permet entà èster proactius e aplicar solucions a cuert tèrme que permeten destensionar era situacion actuau e, der aute, arténher eth compromís dera Generalitat, qu’ei qui a era competéncia exclusiva en matèria d’abitatge, entà, entre d’autes qüestions, trabalhar amassa ena regulacion des abitatges d’usatge toristic, qu’ei un des elements que mos sature eth parc d’abitatge disponible, ath viatge que se compromete a qu’eth Programa d’Abitatge Public anonciat pera Generalitat de Catalunya contemple tanben eth bastiment d’abitatges en Aran e era rèsta deth Pirenèu”. E higie: “Ath delà deth Plan d’Abitatge dera Val d’Aran, a on ja hè un an que trabalham e damb eth que demoram poder impulsar accions en aguest sector tà facilitar er accès tath madeish, tanben auem sollicitat ara Generalitat de Catalunya, dera madeisha manèra qu’ac hérem a arribar ath Govèrn der Estat ja hè quauqui mesi, que se prenguen mesures entà revertir era situacion actuau”.

En aguest sens cau rebrembar qu’era sindica d’Aran adreçaue setmanes endarrèr ath secretari d’Estat d’Abitatge eth listrat que bona part des ajuntaments aranesi an metut a disposicion dera administracion entà acuélher abitatge sociau e assequible.

Vielha, 12 de noveme de 2024