• Eth Conselh Generau d’Aran auance en sòn projècte d’adeqüacion coma equipament museografic dera glèisa de Sant Joan d’Arties, ua actuacion que permeterà adequar era planta baisha coma espaci entà exposicions temporaus e bastir dus humaraus entà exposicions permanents, atau coma adaptar aguesta infraestructura en aspèctes de accesibilitat e servicis basics

Eth govèrn deth Conselh Generau d’Aran auance en sòn projècte de reabilitacion dera glèisa de Sant Joan d’Arties coma sala d’exposicions, en tot treir a licitacion es òbres d’adeqüacion d’aguest espaci coma equipament museografic.

Aguesta glèisa deth sègle XIII, declarada en 2022 Ben Culturau d’Interès Locau (BCIL), requerís d’ua reabilitacion entà poder seguir emplegant-la coma sala d’exposicions, emplec qu’a auut pendent es darrèri ans, en tot adaptar aguest espaci en aspèctes de accessibilitat e servicis basics.

Es òbres sonque afectaràn ar interior der equipament e serviràn entà adequar era planta baisha coma espaci entà exposicions temporaus e bastir dus humaraus entà exposicions permanents.

Aguesta actuacion se trape inclodida laguens deth Plan de Sostenibilitat dera Val d’Aran e eth valor estimat deth contracte ei de lèu 240.000 €. Eth termini de presentacion d’aufèrtes finalize eth 28 de hereuèr.

Er Institut d’Estudis Ilerdencs dera Diputació de Lleida e er Ajuntament de Naut Aran collabòren en aguesti trabalhs damb damb 90.000 € e 25.000,00 €, respectivaments.