Eth Govèrn d’Aran prepause as ajuntaments un Plan entara neteja de pistes forestaus e era regeneracion naturau des bòsqui

Vielha, 15 d’abriu de 2016.- Eth sindic d’Aran Carlos Barrera, a prepausat as ajuntaments dera Val d’Aran un convèni de collaboracion entre eth Conselh Generau d’Aran e es pròpris ajuntaments entara neteja des marges de pistes forestaus e era regeneracion naturau des bòsqui, damb er objectiu de produsir estèra entara produccion de biomassa, entà qu’eth Conselh Generau d’Aran coma administracion forestau pogue realizar es trabalhs de neteja e regeneracion des bòsqui proprietat des ajuntaments. Ena Val d’Aran, i a lèu de 400 Kms de pistes forestaus, e 164 kms ne passen per masses arberades des montanhes.

Eth sindic d’Aran Carlos Barrera, expliquèc qu’“aué en dia, er anautit còst economic dera extraccion dera husta en airaus de nauta montanha, hè qu’aguesta activitat s’age convertit en testimoniau. Ena Val d’Aran, s’acumulen cada an mès de 20.000 mᵌ de husta, que se n’extrèn mens de 3.000 mᵌ. Era extraccion de husta non maderable e era possibilitat de convertir-la en biomassa (estèra e pellet), servirie entà minorar es còsti dera extraccion e dera neteja des camins forestaus e es bòsqui”.

Damb aguesta iniciatiua, eth Govèrn d’Aran tanben se compromet ara installacion de caudères de biomassa entà qu’era maxima quantitat possibla de biomassa produsida ena Val d’Aran, sigue tanben consumida, e ath madeish temps sajar fomentar qu’enterpreses dera Val d’Aran se poguen dedicar en un futur ara produccion de biomassa.

Damb era neteja forestau, s’evite ath delà er envielhiment des bòsqui e qu’es arbes agen bona salut.

Es ajuntaments dera Val d’Aran, seràn es encargadi de comunicar ath Conselh Generau d’Aran es zònes a netejar.