• Ager, era sindica d’Aran, amassa damb es responsables tecniques der airau de politica lingüistica deth Conselh Generau d’Aran e diuèrses institucions que prebotgen era lengua en territòri, prenec part d’aguest Comitat celebrat en Barcelona e qu’auie coma objectiu valorar quin ei er estat der aranés e eth catalan en Catalunya

• Era sindica d’Aran trasladèc as membres deth Comitat eth besonh de que totes es administracions superiors complisquen damb era legislacion e es compromisi e que s’establisquen es mesures e recorsi de besonh entà qu’er aranés sigue viu en Aran

Era sindica d’Aran, Maria Vergés, assistic ager en Barcelona tara amassada damb eth Comitat d’Expèrts deth Conselh d’Euròpa, que s’encuede de valorar eth compliment dera Carta Europèa des Lengues Regionaus e Minoritàries. Aguest ei eth prumèr còp qu’eth Conselh Generau d’Aran ei present en un Comitat d’Expèrts, en tot expausar quin ei er estat actuau dera lengua pròpria dera Val d’Aran.

“Auem trasladat as membres deth Comitat eth besonh de que totes es nòstes administracions superiors complisquen damb era legislacion e es compromisi e s’establisquen es mesures e es recorsi tà qu’er aranés sigue viu, en prumèr lòc en Aran”, afirmaue era sindica d’Aran, en tot híger que: “era proteccion que sus eth papèr a artenhut era nòsta lengua s’a de trasladar ja d’un viatge entà toti ara practica tà sajar qu’er aranés non despareishe”.

Preneren part d’aguesta amassada tanben eth secretari de Politica lingüistica, Xavier Vila, es tecniques de Lengua deth Conselh Generau d’Aran, representants dera Escòla Aranesa e deth Conselh Consultatiu der Aranés.

Era finalitat d’aguest comitat ei contrastar er estat des lengües minoritàries e eth compliment deth respècte des drets lingüistics especificadi ena Carta Europèa des Lengues Regionaus e Minoritàries.