Aguesta setmana an començat es trabalhs de renauïda deth cubèrt dera entrada dera glèisa de Sant Estèue de Montcorbau, ua òbra que se hè tà substituir es cabirons en mau estat, modificar eth desnivèu entà perméter ua major illuminacion naturau deth portau e eth tractament preventiu de tot eth hustatge.

Es trabalhs, qu’an un còst de 12.063.70 euros, formen part des accions a amiar a tèrme enes bens immòbles d’interès artistic o istoric dera Val d’Aran. Era sindica d’Aran, Maria Vergés, manifestaue que “era volontat deth govèrn d’Aran ei era de sajar d’actuar en toti aqueri monuments patrimoniaus qu’actuauments patíssen quauqua problematica pendent aguesta legislatura entà seguir mantenguent eth nòste patrimòni”.

Era pòrta d’accès tara glèisa se trapaue actuaument arrecessada ath dejós d’un cubèrt. Se tracte d’un portau monumentau damb dus batents de husta trabalhada, damb un fronton d’estil barròc, e ath dessús deth fronton, encastrada ena façada, ua estela de marme paleocristiana decorada damb relhèus qu’ei era unica d’aguestes caracteristiques que i a en Aran, eth timpan dera antica portada romanica e diuèrses mensules tanben originàries dera glèisa romanica, uns elements que passauen desapercebudi pera pòca lum que deishaue passar era estructura deth cubèrt.

Vielha, 20 de seteme de 2024