Aué s’a liejut un manifèst entà commemorar eth Dia Internacionau dera Hemna, pera egalitat d’oportunitats.

Eth passat dimenge, dia 6 de març, auèc lòc era 3au edicion dera Corsa dera Hemna.

Es Nacions Unides declarèren eth 8 de març coma Dia Internacionau des Hemnes, ua commemoracion que se celèbre per tot eth mon. Entà commemorar aguest dia, des deth Servici d’Informacion e Atencion ara Hemna (SIAH) deth Conselh Generau d’Aran s’an organizat diuèrsi actes, entre eri era 3au edicion dera Corsa dera Hemna que se realizèc eth passat dimenge, dia 6 de març, peth pòble de Vielha.

Ath delà, aué era conselhèra de Salut e Benéster d’Aran, Anna Díaz, a liejut un manifèst en commemoracion ath dia dera Hemna.

“Des deth Govèrn d’Aran trebalham amassa per un mon en qué totes es hemnes e mainades poguen exercir es sues libertats e expectatives en totes es dimensions dera vida, sense excepcion” a manifestat era conselhèra de Salut e Benéster d’Aran, Anna Díaz.

Vielha, 8 de març de 2016

Conselh Generau d’Aran: Núria Sanjuan