• Eth Conselh Generau d’Aran a signat dus convènis damb era Agéncia Catalana de Torisme entà cooperar ena promocion toristica deth nòste territòri.

• Eth prumèr convèni signat damb era ACT permeterà ath Conselh Generau d’Aran formar part deth conselh de direccion d’aguesta Agéncia e participar de decisions en matèria de promocion.

• Eth dusau acòrd possibilitarà era promocion toristica dera Val d’Aran amassa damb d’auti territòris e entitats deth Pirenèu.

Eth govèrn d’Aran ven de signar dus acòrds damb era Agéncia Catalana de Torisme entà, per un costat, era integracion deth Conselh Generau ena direccion dera Agéncia Catalana de Torisme, e entà desvolopar accions de cooperacion entara promocion toristica. Damb aguest acòrd se harà possible ua inversion de trenta sèt mil euros entà accions que se desvoloparàn ena Val d’Aran.

D’un aute costat, s’a aprovat un convèni de collaboracion entre eth Conselh Generau d’Aran e era Agéncia Catalana de Torisme, era Deputacion de Barcelona, es Patronats de Torisme des Tèrres de Lhèida e Girona, Ferrocarrils dera Generalitat de Catalonha e er Institut entath Desvolopament e era Promocion der Naut Pirenèu e Aran tara promocion deth Pirenèu catalan e Aran, damb accions conjuntes.

Eth conselhèr de Promocion Economica e Torisme, Josep Canut, manifestaue que “poder mantier aguesta relacion de collaboracion damb era Agéncia Catalana de Torisme ei essenciau entà garantizar qu’era promocion deth nòste territòri arribe a toti aqueri operadors, empreses, eca…que poguen auer interès ena Val d’Aran, e ath temps ei ua accion de collaboracion institucionau en aguest encastre”.

Eth govèrn d’Aran trebalhe en desvolopament de politiques de dinamizacion e promocion toristica deth territòri, tà fomentar era qualitat e era diversificacion e entà desvolopar airines de promocion toristica que placen es municipis aranesi en mercat intèrn e extèrn.

Vielha, 25 de junh 2024